Sindrom bipolal
.jpg)
La sindrom bipolal, ance nomida manica-depresa, es un maladia mental cual causa periodos de depresa e periodos de un umor nonormal ativa. La umor ativa es sinfiante e es conoseda como mania o ipomania (si no tan sever, o esce sintomes de psicose es presente). En mania, un person condui se o senti nonormal enerjiosa, felis, o iritada. Los fa comun desides mal con poca regarda a seguentes. La nesesa per dormi es comun reduida. En periodos de depresa, on ave plori, un umor negativa, e reduida contata par oio con otras. La risca de suiside en los con la maladia es alta e plu grande ca 6% tra 20 anios, e autoferi ia aveni en 30-40%. Otra problemes mental, como sindromes de ansia e malusa de medisines o drogas es comun asosiada con esta.
La causas no es clar comprendeda, ma fatores ambiental e jenerical ave un rol. Multe jenes de efetas peti contribui a la risca. Fatores ambiental inclui un istoria de maltrata en enfantia e stresa de dura longa. Ma sirca 85% de la risca es atribuida a jenetica. La sindrom es clasida como bipolal 1 si on ave a min un periodo de manica, con o sin periodos de depresa, e como bipolal 2 si on ave a min un periodo ipomanica (ma no periodos de manica plen) e un periodo de depresa major. En persones con sintomes min sever de dura longa, la sindrom siclotimica pote es diagnoseda. Otra sindromes cual pote mostra se simil inclui sindrom de la manca de atende e iperativia, sindromes de personalia, scizofrenia, e la malusa de drogas, plu alga maladias medical. Esamina medical no es nesesada per un diagnose, ma probas de sangue o imajinte pote es usada per sutrae otra problemes.
Trata tipal inclui psicoterapia e medisines como stabilintes de umor e antipsicosicas. Esemplos de stabilintes de umor inclui litio e anticonvulsantes variosa. Trata nonvolente en un ospital pote es nesesada si un person es un risca a se mesma e otras ma refusa trata. Problemes sever de condui, como ajita o combatosia, pote es manajeda con antipsicosicas de dura corta o benzodiazepinas. En periodos de mania, on recomenda ce antidepresantes es parada. Si antidepresantes es usada per periodos de depresa, los debe es usada con un stabilinte de umor. Terapia eletroconvulsante, an si no bon studiada, pote es atentada per los ci no responde a otra tratas. Si tratas debe es parada, on recomenda ce esta es fa lenta. Multe persones ave problemes finansial, sosial, o relatada a sua emplea causada par esta maladia. Esta difisilias aveni sirca un cuatrida a un trida de la tempo. Resultante de elejes mal de stilo de vive e la efetos ladal de medisines, la risca de mori de causas natural como maladias de cor es du veses lo de la popla jeneral.
La sindrom bipolal afeta sirca 1% de la popla global. En la SUA, sirca 3% es estimada como afetada a alga punto en sua vive. Frecuentias pare simi en femes e omes. La eda plu comun a cual sintomes comensa es 25. La custa economial de la maladia ia es estimada como $45 bilion per la SUA en 1991. Un parte grande de esta ia es relatada a la cuantia alta de dias de labora mancada, estimada a sirca 50 per anio. Persones con la sindrom comun debe fasa problemes de stigma sosial.