Tuvalu

De Vicipedia
Jump to navigation Jump to search
Tuvalu
Tuvalu
Flag of Tuvalu.svg Coat of arms of Tuvalu.svg
Karte Tuvalus.png

Tuvalu, conoseda a ante como la Isolas Ellice, es un isola polinesian situada en la Mar Pasifica, sirca a media entre Hawaii e Australia. Lo es a este-norde-este de la Isolas Santa Cruz (cual parteni a la Isolas Solomon), a sude-este de Nauero, a sude de Ciribas, a ueste de Tocelau, a norde-ueste de Samoa e Uvea e Futuna, e a norde de Viti.

Lo es composada de tre isolas de resife e ses atoles vera, estendeda entre latitude sude 5° e 10° e lonjitude 176° e 180° a ueste de la Linia Internasional de Data. Tuvalu ave un popla de 10,640 persones (conta de 2012). Locada en Oseania, la area intera de tera de la isolas de Tuvalu es 26 cilometres cuadrida.

La abitores prima de Tuvalu ia es polinesianes. On crede ce la polinesianes ia sperde de Samoa e Tonga a la atoles tuvalu, tal ce Tuvalu ia furni un petra de paso per migra a la comunias periferial polinesian en Melanesia e Micronesia.

En 1568, un navigor espaniol nomida Álvaro de Mendaña ia es la european prima ci ia naviga tra la arcipelago, vidente la isola Nui en sua mision xercante Terra Australis (la Tera Sude). En 1819, la isola Funafuti ia es nomida Isola Ellice; la nom Ellice ia es aplicada a tota nove isolas pos la labora de Alexander George Findlay, un idrografiste engles.

La isolas ia entra a la sfera de influe de Britan en la tarda de la sentenio 19, cuando cada de la Isolas Ellice ia es declarada como un Protejeda Brites par Captain Gibson de HMS Curacoa entre 9 e 16 otobre 1892. La Isolas Ellice ia es manejada como un protejeda brites par un Comisionor Abitante de 1892 a 1916 como parte de la Teritorios Brites de la Pasifica Ueste, e a pos como parte de la colonia Isolas Gilbert e Ellice de 1916 a 1974.

On ia fa un referendo en desembre 1974 per deside esce la Isolas Gilbert e la Isolas Ellice debe ave sua propre sistemes de maneja. Par causa de la referendo, la colonia Isolas Gilbert e Ellice ia sesa esiste a 1 janero 1976 e la colonias individua brites Ciribas e Tuvalu ia comensa esiste. Tuvalu ia deveni completa autonom en la Comunia de Nasiones a 1 otobre 1978. A 5 setembre 2000, Tuvalu ia deveni la membro 189 de la Nasiones Unida.

La site capital es Funafuti.

La linguas major es tuvalu, engles, samoan, e ciribas.