Nauero

De Vicipedia
Ripublik Naoero
Republic of Nauru

Nauero (ofisial la Republica de Nauero, e conoseda en la pasada como Isola Plasente) es un isola e pais en Micronesia en la Mar Pasifica sentral. Sua visina la plu prosima es Isola Banaba en Ciribas, a 300 cilometres a este. Lo es situada a norde-ueste de Tuvalu, a norde de la Isolas Solomon, a este-norde-este de Papua Gine Nova, a sude-este de la Statos Federada de Micronesia, e a sude de la Isolas Majel. Con 10 084 abitores en un area de 21 cilometres cuadrida, Nauero es la stato la plu peti en la Pasifica Sude e la stato tre de la plu petis (par area) de mundo, pos sola la Site Vatican e Monaco.

Colonida par persones de Micronesia e Polinesia sirca 1000 aec, Nauero ia es proprida e reclamada como sua colonia par la Impero Deutx en la tarda de la sentenio 19. Pos la Gera Mundal Prima, Nauero ia deveni un comision de la Alia de Nasiones, dirijeda par Australia, Zeland Nova e la Rena Unida. En la Gera Mundal Du, Nauero ia es ocupada par soldatos nion, ci ia es sircovenida par la avansa de la Aliadas a traversa de la Pasifica. Pos la fini de la gera, la pais ia deveni un fidusia de la Nasiones Unida, e ia gania sua autonomia en 1968.

Nauero es un isola de roca de fosfato, con deponedas rica prosima a la surfas cual ia fasili operas de mina. Alga recursos de fosfato resta cual, en 2011, no ia es economial viable per estrae. En la tarda de la desenio de 1960 e la temprana de la desenio de 1970, Nauero ia ave la revenu la plu alta per person de tota statos de mundo. Ma cuando la reservas de fosfato ia es consumada e la ambiente de la isola ia es grave danada par mina, la valua de la fidusia instituida per maneja la ricia de la isola ia diminui. Per gania revenu, per un tempo corta, Nauero ia deveni un paradiso finansial e un sentro nonlegal de blanci mone.

De 2001 a 2008, e denova de 2012, lo ia aseta aida de la Governa Australian par intercambia per ospita un deteneria. Como resulta de sua depende forte de Australia, multe fontes ia identifia Nauero como un stato cliente de Australia.

La lingua major es nauero.