Statos Federada de Micronesia

De Vicipedia
Statos Federada de Micronesia
Informa jeneral
Capital: Palikir
Lingua ofisial: Engles
Dirije
Governa: Republica federal parlamental su democratia nonpartisan
- Xef de stato: Presidente Peter Christian
- Xef de governa: Vis Presidente Yosiwo P. George
Otras
Area: 702 km²
Popla: 106 104
Densia: 158,1
PIB: $310 milion
Mone: Dolar de Statos Unida (USD)
Zona de ora: (UTC+10 e +11)
Numero de telefon: +691
Interede: .fm

La Statos Federada de Micronesia (SFM) es un pais de isolas e un stato asosiada de la SUA en la ueste de la Mar Pasifica. Lo es composada de cuatro statos: de ueste a este, Yap, Chuuk, Pohnpei e Kosrae. En junta, los conteni sirca 607 isolas (un area combinada de tera de sirca 702 km²) cual estende tra un distantia lonjitudal de cuasi 2700 km² pico a norde de la ecuator.

Los es a norde-este de Gine Nova, a sude de Guam e la Isolas Mariana, a ueste de Nauru e la Isolas Majel, a este de Belau e la Pilipinas, a sirca 2900 km a norde de Australia este, e a sirca 4000 km a sude-ueste de la isolas major de Hawaii.

An si la area intera de tera de la SFM es alga peti, lo ocupa plu ca 2 600 000 km² de la Mar Pasifica, tal ce la pais ave la zona economial escluinte 14 de la plu grandes de mundo. La capital es Palikir, situada sur Isola Pohnpei, e la site la plu grande es Weno, locada en la Atol Chuuk.

Cada de sua cuatro statos es sentrida sur un o plu isolas major e alta, e tota estra Kosrae inclui multe atoles plu distante. La Statos Federada de Micronesia es estendeda tra un parte de la Isolas Caroline en Micronesia, un rejion plu grande cual es composada de miles de isolas peti, divideda entre paises diversa. La parola "Micronesia" pote refere o a la Statos Federada o a la rejion intera.

La SFM ia es un parte de la Teritorio Fidusial de la Isolas Pasifica (TFIP, un Teritorio Fidusial de la Nasiones Unida, dirijeda par la SUA), ma lo ia formi sua propre governa constitual a 10 maio 1979, deveninte un pais pos ateni autonomia a 3 novembre 1986 su un Acorda de Asosia Libre con la Statos Unida. Otra grupos de isolas visina, ance membros pasada de la TFIP, ia formi sua propre governas constitual e ia deveni la Republica de la Isolas Majel e la Republica de Belau. La SFM ave un seja en la Nasiones Unida.

Sua popla, en la anio 2007, ia es sirca 107 862 persones. La linguas major es engles (ofisial e comun), trukes, pohnpeian, yapes, kosrean, ulithian, woleaian, nukuoro e kapingamarangi.