Tocelau

De Vicipedia
Tocelau
Tokelau
Informa jeneral
Capital: Fakaofo
Lingua ofisial: Tocelau e engles
Dirije
Governa: Monarcia constitual
- Xef de stato: Rea Elizabeth 2
- Xef de governa: Siopili Perez
Otras
Area: 10 km²
Popla: 1 499
Densia: 115
PIB: US$10 milion
Mone: Dolar de Zeland Nova (NZD)
Zona de ora: (UTC+13)
Numero de telefon: +690
Interede: .tk

Tocelau es un pais de isolas en la sude de la Mar Pasifica. Lo es composada de tre atoles tropical de coral (de la norde-ueste: Atafu, Nukunonu e Fakaofo), de cual sua area combinada de tera es 10 km² e sua popla es sirca 1500 persones. Sua capital move entre la tre atoles a cada anio. Tocelau es a norde de la Isolas Samoan (de cual Isola Swains es la plu prosima), a este de Tuvalu, a sude de la Isolas Fenix, a sude-ueste de la Isolas Linia (plu distante) e a norde-ueste de la Isolas Cook. Asta 1976, la nom ofisial de la pais ia es la Isolas Tocelau.

Con la popla cuatro de la plu petis de cualce pais, Tocelau es un gidor de enerjia renovable, la nasion prima de mundo cual funsiona intera par enerjia solal. Lo es un nasion libre e democrata, con un vota a cada anio tre. Tota aspirores es nondependente: Tocelau ave no partitos political.

La lingua la plu parlada es tocelau, par 93,5% de persones.

Un teritorio dependente de Zeland Nova, a veses on refere a lo con sua nom colonial, la Isolas de Uni. En 2007, la Asembla Jeneral de la Nasiones Unida ia identifia Tocelau como un teritorio nonautonom. An tal, Tocelau es descriveda como un nasion par e la governa de Zeland Nova e la governa tocelau.

La funda de la sistemes legal, dirijal e judal de Tocelau es la Ata de la Isolas Tocelau 1948 e sua cambias. En 1992, on ia institui un xef de governa, ci on eleje a cada anio tre. Ante esta, la Dirijor de Tocelau ia es la ofisior la plu alta de la governa. En novembre 1974 la dirije ia es moveda de la Departe per Maoris e Isolas a la Ministreria de Esternas, e de alora asta setembre 1980, cuando on ia cambia la regulas per dirije Tocelau, la Ministro de Esternas de Zeland Nova ia es la dirijor de Tocelau. La regulas a pos ia permete ce la Ministro de Esternas asinia un person conveninte per es la Dirijor.