Popla preistorial de Sisilia
La popla preistorial de Sisilia ia es tribus conoseda a la scrivores de Elas antica como la elimianes, la sicanianes, e la siculianes (de ci la isola deriva sua nom).
La sicanianes ia es la abitantes la plu vea de Sisilia con un nom recordada. La istoriste elinica Tusidide ia sujesta ce los ia orijina a la penisola iberian, de un area de la rio los nomida "Sicano" (liada a la rio moderna nomida la Rio Xúquer), e ia migra a Sisilia seguente un invade par la ligurianes. Otras ia sujesta ce los ia es orijinal a la isola. Algas ia sujesta ce los ia es influeda par la cultur de vasos campanin.
La elimianes ia es la popla seguente ci ia coloni Sisilia, posible de la isolas de la Mar Ejeo, o de Anatolia o Liguria. Los ia abita la canto norde-ueste de la isola, forsante la sicanianes per move a la este. Sua cultures no difere multe, ma la elimianes ia adota plu de cultur de la elinicas, e usa la alfabeta elinica per sua lingua. La lingua no es bon conoseda, ma pare ave cualias simil a los de hitita o otra linguas anatolian.
La siculianes ia es la popla ci ia ariva la plu tarda, en la milenio un aec, e ia es relatada a la popla italica de Italia sude, como la italos de Calabria, la enotrianes, la cones, e la leuternianes, la opicanes, e la auruncianes. Los ia introdui la usa de fero a Sisilia de la eda de bronze, e ia trae cavalos domada ala. Alga rexercores sujesta ce los ia es un de la xekelex, un de la "poplas de la mar" notada en la enscrives de Karnak en Egipte (de la sentenio 13 aec tarda).
De la sentenio 11 aec, la fenisianes ia comensa coloni en Sisilia ueste, pos ia comensa ja en Africa norde. En no plu ca un sentenio, on pote trova colonias major de fenesianes a Solunto, Palermo, e la Isola Motia (prosima a Marsala de oji), tota a la norde-ueste de la isola. Cuando la colonia de Cartago ia deveni plu potiosa ca sua jenitores, los ia gania controla de la isola. Plu tarda, lo deveni dominada par la romanes.