Linguas scitian
La linguas scitian es un grupo de linguas irani este de la periodo media, parlada en un rejion vasta nomida Scitia. Estra oseta, cual desende de un varia de alan, esta linguas es estinguida. La linguas irani este moderna, como los de Pamir, es relatada a la dialetos de scito-cotan de la renas de Cotan e Tumxuc en la Basin Tarim antica, en Xinjiang sude de Xina moderna.
La loca e estende de Scitia ia varia tra tempo, ma jeneral, lo ia inclui la parte de Europa este de la Rio Vistula e multe de Asia sentral a la Basin Tarim. La grupos dominante entre la scitianes ia es pastores nomada de Asia sentral e la stepe norde de la Mar Negra e Mar Caspio. Partetas de sua parla conoseda de enscrives e parolas sitada par autores antica, con analise de nomes, indica ce lo ia es un lingua indoeuropean, plu spesifada de la grupo irani de la linguas indoiranian. Alexander Lubotsky ia resoma la vista linguistica como esta:
Nonfortunosa, nos sabe cuasi no cosa sur la scitianes de acel periodo - nos ave sola alga nomes personal e tribal en fontes elinica e farsi a nosa dispone - e no an pote determina con cualce grado de sertia esce lo ia es un lingua singular.
La majoria grande de eruditas de scitia acorda ce on pote vide la linguas scitian como un parte de la grupo irani este de linguas. Esta ipotese depende de la fato ce la enscrives elinica de la costa norde de la Mar Negra ave alga sentos de nomes sarmatian mostrante un prosima a la lingua oseta. La clasi de la linguas irani es jeneral no plen solveda, e la linguas irani este no es mostrada como formi un sugrupo vera jenetical.
Alga eruditas deteta un divide de scitian entre du dialetos: un dialeto ueste, plu conservante, e un dialeto este, plu inovante. La linguas ia pote formi un continua dialetal:
La linguas alan o scito-sarmatian en la ueste ia es parlada par popla orijinal irani de la sentenios 8 e 7 aec e pos, en la area de Ucraina, Rusia sude, e Cazacstani. Oseta moderna survive como un continua de la lingua.
La linguas saca o scito-cotanes en la este ia es parlada en la sentenio prima en la Rena de Cotan (en Xinjiang moderna), e incluinte la cotanes de Cotan e la tumxuces de Tumxuc. Otra linguas irani este relatada a scitian es cuarezmian e sogdian.
La iranis este temprana orijina en la cultur de Iaz (sirca 1500 - 1100 aec) en Asia sentral. La scitianes ia migra de Asia sentral a Europa este en la sentenios 8 e 7 aec, ocupante Ucraina e Rusia sude moderna e la Basin Carpatian e partes de Moldova e Dobruja. Los desapare de istoria pos la invades de Europa par la hunes en la sentenio sinco aec. La popla turcica e slavica ia asorbe probable la plu de persones cual ia parla scitian. Ma en la Caucasos, la lingua oseta resta usada oji, en cuando en Asia sentral, alga linguas de la grupo irani este es ancora parlada, per dise, paxtu, la linguas de Pamir, e iagnobi.
Referes
[edita | edita la fonte]Lubotsky, Alexander (2002). "Scythian elements in Old Iranian" (PDF). Proceedings of the British Academy. The British Academy; azargoshnasp. 116: 189–202.