Linguas centum e satem

De Vicipedia
Jump to navigation Jump to search
La linguas centum es blu, satem es roja; la roja oscur indica un teoria cual ia sujeste esta area como la orijina de satem

La membros de la familia de linguas indo-european pote es clasida como o linguas centum o linguas satem, dependente de como la consonantes velal (pd, la sonas prosima a c e g en lfn) de lingua reconstruida de PIE (proto-indo-european) ia developa. Un esemplo de la developas diferente es donada par la parolas per sento (100) en linguas indo-european temprana atestada: en latina, la parola ia es centum (comensante con AFI /k/); en avestan, la parola ia es satem (comensante con AFI /s/.

La linguas centum inclui la linguas germanica, celtica, [[linguas italica|italica], elenica, e tocarian. En la desendentes de latina, on pote nota ce "centum" ia deveni "cent" en franses, pronunsiada /sɑ̃/, "cento" en italian, pronunsiada /ˈtʃɛnto/, etc. En multe linguas, un palati de k e g ia aveni ante vocales como /i/ e /e/. Esta ia aveni multe plu tarde ca la orijinal satemi de PIE.

Nota ce, en alga linguas o dialetos de linguas celtica, italica, e elenica, kw deveni p. An ce la cambia pare strana, lo aveni en multe familias de linguas tra la mundo.

La linguas satem inclui la linguas balto-slavica e indo-iranian. La linguas xcip (albanian) e haieren (armenian) mostra alga cosa cual linguistes ia nomi "partal satemi", pd lo pare ce la prosede de satemi ia avansa a alga grado, ma no completa.

Lo es suposada ce hitita ia separa se de la otra linguas de la familia ante esta cambia (o cambias), e donce no es tipal clasida como centum o satem. Alga linguistes crede ce la linguas anatolian, ia reteni la orijinal tre spesies. Otras nota ce hitita pare plu como un lingua centum.

On ave alga nonacorda entre espertas, ma jeneral los suposa du o tre series de esta consonantes. Orijinal, los ia prefere tre series:

*ḱ *ǵ *ǵʰ (la palatovelales)
*k *g *gʰ (la velales simple)
*kʷ *gʷ *gʷʰ (la labiovelales)

La teoria de tre series dise ce, en la linguas centum, la palatovelales ia deveni velales simple; en la linguas satem, la labiovelals ia deveni velales simple, e la palatovelales es "sibilida", pd los es pronunsiada como un forma de la sonas plu frontal, como AFI /s/z/,/ʃ/ʒ/, /ʧ/ʤ/, o /c, ɟ/.

La espertas ci prefere du spesies colasa la velales simple e la palatovelales, con la resuta asi:

*k *g *gʰ
*kʷ *gʷ *gʷʰ

La teoria de du series dise ce la linguas centum representa la forma orijinal usada en PIE, e la linguas satem ia cambia los (velales simple es sibilida; la labiovelales deveni simple). Esta ave alga suporta, car la linguas satem es prosima con lunlotra, ma la linguas centum es plu separada, spesial cuando on inclui hitita en Anatolia e tocarian en Xina norde-ueste.