Linguas tocarian

De Vicipedia
Jump to navigation Jump to search
Un frato de un manoscrito en tocarian B

La linguas tocarian es la ramo la min conoseda de la familia de linguas indoeuropean. Lo ia es parlada en la sentenios ses, sete e oto en la parte de Xina moderna cual on nomi Txindjiang. La nom "tocarian" veni de elinica, en cual alga poplas de esta area ia es nomida Τόχαροι Tokharoi.

La linguas tocarian inclui du linguas: tocarian A (o turfanian, o arsi, o tocarian este), e tocarian B (o cutxean, o tocarian ueste). Ma un person ci ia parla la un no ia pote comprende fasil la otra. On divina ce la du ia es separada par multe sentenios.

La linguas parteni a la linguas centum de indoeuropean (como la linguas romanica, germanica, celta e elinica de Europa). Ma los ia deveni separada de los a cisa un milenio aec, e ia es ensircada par la linguas satem (como slavica e indoiranian).

On ave partes de manoscritos de la sentenio oto (e alga plu veas), scriveda sur folias de palma, tabletas de lenio, e paper xines, conservada par la clima plu seca de la deserto basa de Tarim. Otra esemplos de la linguas ia es descovreda en Cutxa e Carasar, incluinte multe scrives mural. La scrives ia es traduis de testos budiste e maniste, notas comersial, testos medical e majial, e ance un poesia de ama.

La alfabeta cual la tocarianes ia usa veni de la abugida (alfabeta silabal) brahmi (indian norde), e es nomida "brahmi apoiada".

Tocarian ia es estinguida pos 840 ec, cuando la cirghiz ia forsa la uigures de Mongolia a la Tarim, e la uigures ia concista la tocarianes e asorbe los.