Istoria temprana de la mongoles

Esta article es sur la istoria temprana de la mongoles. Comensante con la abitantes preistorial, la istoria es recordada en la multe scrives xines sur sua visinas "barbar". La eda fini con la cade de imperos mandju e turces e la renase de la mongoles con la hanes mongol, spesial Txingis Han.

La evidente de umanas multe temprana no es trovada en la area de Mongol, cual no es tan surprendente si on considera la clima tra la milenios ala. Arceolojistes ia descovre alga utiles de petra en la rejion sude de la Deserto Gobi, e desinias en cavas en provinses Khovd e Bayankhongor. Un abitada de cultivores neolitica ia es trovada en provinse Dornod. Otra evidentes de Mongol ueste inclui sola campas tempora de xasores e pexores.

La cultur de enteras de bloco de la Edas Bronze tarda e Fero temprana, relatada a la proto-mongoles, sperdeda tra Mongol e partes de Xina norde, Rusia sude, e Mandju. Esta cultur ia es la trovada major de Mongol de la Eda de Bronze.

Petras de reno e curganes peti (kheregsuures) es de esta eda, ma alga teoristes dati los como de la sentenio 7 e 8 aec. Petras de reno es megalitos antica gravada con simboles, cual es trovada tra Eurasia sentral e este, ma es consentrada xef en Sibir e Mongol. Los es posible asosiada con enteras antica, como gardores de la mor. Los pote es asosiada con xamanisme de la eda sirca 1000 aec. Sirca 900 petras ia es descovreda, 700 en Mongol, la plu en la area de Lago Baical e la Montes Altai. Un cuantia peti de petras de reno ia es trovada en Cazacstan, Asia sude-ueste, Ucraina, e an un esemplo prosima la Rio Elbe.

Per la sentenio 8 aec, la abitantes de la parte ueste de Mongol ia es migrores nomada indoeuropean, probable scitianes o yuezhi. En partes sentral e este, la multe tribus ia es xef asian este, spesial mongoles. Popla turcica ia abita norde de la mongoles, e mandjus a la este.

Un compleso vasta de entera de la Eda de Fero, de sentenio 5-3 aec, ia es desenterada prosima a Ulaangom, cual ia es plu tarda usada par la xiongnu. Con la apare de armas de fero per la sentenio 3 aec, la abitantes de Mongol ia comensa formi alias de clanes vivente en la stilo de xasores e pastores.

An si la plu parte de Asia sentral ia ave modos de vive simil, la situa en la stepes mongol ia es unica car migra ia es limitada par impedis natural como la Montes Altai]] a la este, la Deserto Gobi en la sude, e la taiga de Sibir en la norde, tota nonconveninte per la modo de vive nomada. Esta impedis ia limita migra, ma ance limita invadores. La clanes mongol sola alia con otra clanes mongol, ci comparti la lingua, relijio, e modo de vive mongol. Esta ta es plu tarda un vantaje contra la menasa de la imperos xines. Los ave combates repeteda con la dinastias xines de Shang e spesial de Zhou, cual ia comensa conciste e sclavinte mongoles. Per la eda de la Statos Gerante en Xina, la dinastias de Zhao, Yan, e Qin ia comensa prosimi e concista Mongol sude. Cuando la dinastia Zin ia uni tota de la renas de Xina en un impero, la Rena Sahun de la popla xiongnu ia es formida sur la stepes mongol e la clanes autonom ia es unida como un stato, e la mongoles ia es secur de la xines estendente.

La Impero Xiongnu

La crea de la Impero Xiongnu en Mongol en la sentenio 3 aec ia marca la comensa de statia en Mongol. La cor etnical de la xiongnu no es serta, ma es jeneral suposada como mongol. La cultur de la xiongnu e la mongoles ia ave multe similias, per esemplo la usa de iurtes portada sur vagones, la arco composada construida de oso, la tradision de la "canta longa", e un jua de table.

La apare prima de la xiongnu en la arcivos xines ia aveni cuando la xines ia repulsa un atenta par la xiongnu per invade ultra la Rio Jala. La militaria xines ia adota alga cualias de la militaria xiongnu, como pantalones e arcores montada con stribos, e ia xasa la xiongnu tra la Gobi en un mision cruel de puni. La mures e fortreses de la xines ia es liada per formi la Mur Grande de Xina de 2300 km longo la borda norde, como un parador contra plu invades par la nomadas.

La fundor de la Impero Xiongnu ia es Toumen. El ia es segueda violente par sua fio Modu Shanyu, ci alora concista e unida la tribus variosa. A la culmina de sua potia, la xiongnu ia estende de Lago Baical e la Mur Grande e de la Montes Tian Shan a la cadena de Montes Cingan. En sentenio du aec, la xiongnu ia deveni interesada en la area de la Montes Altai e la Lago Balcax, abitada par popla indoeuropean, incluinte la yuezhi, ci ia move ala como la resulta de un defeta plu temprana par la xiongnu. Gera entre la yuezhi e xiongnu continua per sentenios, ma ultima la xiongnu ia gania. La yuezhi ia migra alora a la sude-ueste, a Bactria.

En 200 aec, la dinastia Han de Xina ia comensa un campania militar en la teritorio, atentante domina la xiongnu. Ma la xiongnu ia vinse la han en 198 aec, e imperor Gao ia debe sede la teritorio norde de la Mur Grande a la xiongnu, e lo sude de la Mur Grande ta resta xines (cual no ia para plu atacas par la xiongnu!). Plu, Xina ia es obligada paia tribui a la xongnu. En 176 aec, la Impero Xiongnu ia estende a 4,030,000 km2.

En la sentenios seguente, la fortia de la xines ia descrese, e gera entra la xines e la xiongnu continua. Ultima, en la sentenio prima ec, un dinastia Han reviveda ia recovre sua teritorios.

La Impero Xianbei

Pos ce la xiongnu ia fende final entre du partes en 48 ec, la xianbei ia move de la este a la rejion vacuida par la xiongnu. La xianbei ia es un ramo norde de la dongu, un grupo mongol notada en la istorias xines como esistente tan temprana como la sentenio 4 aec. Los ia es entre la popla prima concistada par la xiongnu. Ma cuando la stato xiongnu ia debili, la dongu ia rebela. Par la sentenio prima ec, du sudivides de la dongu ia developa: la xianbei en la norde e la suhuan en la sude.

La xianbei ia solidi en un stato su Tanshihuai en 147 ec. El ia forsa la xiongnu de Zungaria e la dinglinges a la norde de la Montes Saian, e en esta modo securinte la domina de la grupos mongol halha e tsahar. La xianbei ia repulsa un invade par la dinastia Han en 167 ec e concistada areas de Xina norde en 180 ec.

La Impero Xianbei no ia dura longa, ma ia pari multe statos tribal longo la frontera xines, incluinte la tuoba, un sugrupo de la xianbei, en la area aora conoseda como Shanxi. Per la fini de la sentenio 4, la rejion entre la Rio Iangtze e la Deserto Gobi, incluinte un parte grande de moderne Xiajiang, ia es dominada par a Tuoba. Los ia deveni ultima la dinastia Wei Norde. Los forsa a rouran, un grupo mongol nova, de la stepes norde de la Montes Altai, e ia reconstrui la Mur Grande. Par la media de la sentenio 5, Wei Norde ia penetra la Basin Tarim. An si la costumes xines ia repone los de la tuoba, Tuoba Wei esiste asta 581.

La Hagania Rouran

Un ramo de la xianbei, la rouran, ia es solidida su Mugulyu. En la sentenio 5 tarda, la rouran ia fundi un impero nomada potiosa cual ia sperde plu norde ca la Wei Norde. Lo ia es probable la rouran ci ia usa prima la titulo han. La rouran ia rena Mongol, Cazacstan este, parte de Gansu, Xinjiang norde, Mongol interna, partes de Xina norde-este e Sibir sude. La Impero Heftalite ia es un stato vasal su la rouran per un sentenio. Shelun ia prende la titulo de hagan en 402 cual marca la fundi de la stato de la Hagania Rouran. La tuoba ia condui geras longa contra la hagania. La turcicas de Altai cual ia es vasales de la rouran ia revolta en 552 es ia fundi la Hagania Turcica. La rouranes ia es final vinseda par la turcicas en 555. Parte de la rouran ia sorti de la teritorio presente de Mongol e move este, posible tan distante como la rejion de Romania moderna. La otra rouranes ia resta en Mongol e ia deveni la asedentes de la tribus tatar. Los e otra tribus mongol ia abita en la parte este de Mongol en la periodo turcica. Otra mongoles cual ia migra este ia reveni en la sentenio 8.

La Hagania Gocturc

La Wei Norde ia desintegra rapida como un resulta de la rebelas de la militar tuoba cual ia es oposada a la cultur xines, cuando un desastre ia aveni per la hagania rouran. La turcicas de la Altai (gocturces, cual la xines nomi la tujue) ia es vasales de la rouran e ia servi como forjores per los. En 552, la gocturces ia rebela contra la rouranes. La rebela ia comensa en la Montes Altai, do multe de la gocturces ia labora en la minas de fero, afin la gera es comun nomida "la rebela de la forjores". La xef de la rebelores ia es Buman, ci ia deveni la fundor de la Hagania Gocturc. Entre 546 e 553 la gocturces vinse la rouran e ia deveni la plu potiosa nasion en Asia sentral.

La dinastias xines Qi e Zhou ia sede en 570 e ia comensa paiante tribui a la gocturces. Ma la dinastia nova de Sui ia para sua tribui e gera entre la Sui e la gocturces ia comensa. La xines ia pote divide la haganias entre partes este e ueste, e la gocturces este sede e reconose la domina de la Sui. Un luta entre nobiles turcica ia resulta en sua defeta par la dinastia Tang en 630. La Tang ia reuni xina e destruida la potia de la turcicas este e ia comensa domina la citan, seminomadas mongol, e ia fundi la protejoria Anbei entre la Altais e la citanes. La hagania de la uigures ia es cargada con la proteje de Anbei.Eentre 641 e 648, la Tang ia concista final la turcicas ueste e reinstitui la domina de Xina sur Xinjiang. Ma un rebela en 682 su la xefias de Kutuluk e Tonyukuk ia restora la Hagania Turcica.

Pos atacas e repulsas cual continua per un sentenio, la impero ia cade ultima en 744 par un lia de xines, uigures, e otra fortias nomada.

La Hagania Uigur

La uigures, ci ia es suordinada a la gocturces, ia revolui en 745 e ia fundi la Hagania Uigur, cual repone la hagania de la turcicas este. La hagan Bayanchur ia fundi la site Ordu-Balig sur la Rio Orcon en 751. La Impero Tang ia invitada la uigures per vinse la rebelas de An Lushan en 755, e la campanias de la uigur ia resulta en pas con la dinastia Tang de Xina, cual ia paia compensa per la gera. An si un parte sinifiante de la uigures ia es budiste, e la plu de los ia resta como xamanistes, manisme ia deveni la relijio ofisial de la hagania en la sentenio 8. La cultur e economia de la Hagania Uigur ia es plu avansada ca los de sua presedentes: la uigures ia usa un calendario de 12 menses, ia calcula la datis de eclises solal e lunal, e ia developa sua propre sistem de scrive, fundida sur la alfabeta sogdian. Ma la dinastia Tang ia coraji secreta ce la cirgiz de la Rio Ienisei ataca la uigures, resultante en la cade de la Hagania Uigur par un ataca par la cirgiz en 840.

La destrui de la Hagania Uigur ia resulta en la fini de la domina par la turcicas en Mongol. Lo pare ce la cirgiz no ia es interesada en asorbe teritorios nova, e sentri sua state en Hacasia. La eda seguente parteni denova a la Mongoles.

La dinastia Citan Liao

La citanes ia es un grupo etnical con un lingua relatada a la linguas mongol. Sua renor Ambagyan ia fundi la dinastia Liao en 907. Esta dinastia ia covre un parte sinifiante de cual es aora Mongol, incluinte la basines de la rios Cerlen, Tuul, e Orcon, la area vacuida par la uigures.

La dinastia Liao ia deveni plu forte e ia ocupa partes de Xina norde, incluinte la site aora nomida Beijing. Per 925, la citanes ia rena Mongol este, la plu parte de Mandju, e multe de Xina norde de la Rio Jala. Per la media de la sentenio 10, la xefes citan ia institui se como imperores de xina norde, e ia adota la nom Liao per sua dinastia. Los ia construi sites e domina sua cultivores como modos de solidi sua impero.

La teritorio de la impero es composada de du partes: un ia es poplada par pastores en la norde, la otra con cultivores en la sude. Lubugu, neto de Ambagyan, e un erudita nomida Tulyubu ia developa un alfabeta fundida sur xines en 920. Plu tarda, Tela, un fio de Ambagyan, ia developa un alfabeta fundida sur la alfabeta uigur. Un tecnolojia de primi ia es developada en la impero, e la lingua de la citanes ia es studiada en paises estra la impero.

La dinastia Jin

Un popla tungusica, la jurtxen, asendentes de la mandju, ia formi un alia con la dinastia Song e ia redui la dinastia Liao a un vasal pos un gera de sete anios (1115-1122). La xef de la jurtxenes ia nomi se la fundor de un eda nova, la dinastia Jin. Sin pausa, la jurtxenes ia concista Goreo (Corea) en 1226, e ia invade la teritoria de sua alias la Song, cual causa un gera cual ta dura la resta de la sentenio. Cuando la dinastia Liao ia cade, alga citanes ia fuji a ueste e ia fundi la Qara Citai en Xinjiang e Cazacstan este. En 1218, Txingis Han ia destrui Qara Citai, pos cual la citanes ia desapare de istoria. Oji, studias jenetical de la daures, un popla ci parla un lingua mongolica en Xina, es la desendentes direta e la citanes; otra citanes ia es asorbeda par la mongoles, turcicas, e han xines.