Yuezhi
La yuezhi (xines: 月氏; pinyin: Yuèzhī) ia es un popla indoeuropean antica prima descriveda en arcivos xines como pastores nomada abitante en un savana seca en la parte ueste de la provinse moderne xines de Gansu, en la milenio prima aec. Pos un defeta major par la xiongnu en 176 aec, la yuezhi ia fende entre du grupos migrante en dirijes diferente: la yuezhi major e la yuezhi minor.
La yuezhi minor ia migra sude a la borda de la plato tibetan e locas variosa en Xina. La yuezhi major ia migra orijinal a la norde-ueste a la vale de la Rio Ili (entre Xina e Cazacstan de oji), do los ia desloca elementos de la sacas. Los ia es forsada de la vale Ili par la wusunes e ia migra sude a Sogdia e plu tarde Bactria, do los ia defeta la Rena Greco-Bactrian. La yuezhi major ia es comun identifiada con la popla bactrian notada en fontes clasica european, como la tohari e asi. En la sentenio prima aec, un de la sinco tribus de la yuezhi major en Bactria, la cuxanes, ia comensa asorba la otra tribus e poplas visina. La Impero Cuxan cual resulta, a sua culmina en la sentenio 3 ce, ia estende de Turfan en la Basin Tarim e la norde, a la plano de la Ganga de India en la sude. La Cuxanes ia ave un rol importante en la developa de comersia sur la Via de Seda e la introdui de budisme a Xina.