Hititas

De Vicipedia
Un mapa de la Impero Hitita a sua estende la plu grande, con la rena hitita sirca 1350 a 1300 representada par la linia verde
La porton de la sfinje en Hattusa
Joalas antica de Anatolia

La Hititas ia es un popla de Anatolia ci ia ave un rol importante en la crea de un impero sentrida a Hattusa en Anatolia norde-sentral sirca 1600 aec. Esta impero ia ateni sua culmina en la sentenio 14 media aec sur Suppiluliuma 1, cuando lo ia inclui un area cual inclui la plu de Anatolia e ance partes de Levante e Mesopotamia norde.

Entre la sentenio 15 e 13 aec, la Impero de Hattusa, comun nomida la Impero Hitita, ia deveni en un disputa con la Impero Egiptian, la Impero Asirian media, e la Impero Mitanni per controla de Asia sude-ueste. La Asirianes ia emerje ultima como la potia dominante e ia propri un parte grande de la Impero Hitita, en cuando la resta ia es sacada par un grupo nova en la rejion, la frigianes. Pos sirca 1180 aec, en la colasa de la eda de bronze, la Hititas ia fende a alga site-statos autonom "neo-hitita", alga de cual ia survive asta la sentenio 8 aec ante sedente a la Impero Neo-Asirian.

La lingua hitita ia es un membro distinguida de la ramo anatolian de la familia de linguas indo-european. Con la lingua relatada Luwian, lo es la lingua indo-european la plu vea conoseda. La hititas ia refere a sua lingua como nešili "la lingua de Nesa", ma nomida sua pais como la Rena de Hattusa. La nom comun "hititas" es la resulta de sua identifia inisial con la hititas de la Biblio en la arceolojia de al sentenio 19. An si los usa la nome Hattusa per sua stato, la hititas debe es distinguida de la hatianes, un popla plu temprana ci ia abita la rejion de Hattusa asta la comensa de la milenio 2 aec e ia parla un lingua nonrelatada conoseda como hatian.

La istoria de la sivilia hitita es sabeda la plu de la testos cuneforma trovada en la area de sua rena, e de la coresponde comersal trovada en arcivos variosa en Asiria, Babilonia, Egipte, e Asia sude-ueste, de cual la desifrida es ance un aveni major en la istoria de linguistica indo-european. La militaria hitita ia usa susedosa la carones e, an si parteni a la eda de bronze, la hititas ia es la avrivias de la eda de fero, developante la fabrica de cosas de fero tan temprana como sentenio 18 aec. A este tempo, donadas de la "om de Burushanda" de un trono e setro de fero a la re canexite Anitta ia es recordada en la Enscrive de Anitta. La hititas ia es la prima popla indo-european cual usa fero. Car fero mineral ia es multe otenable en la area, los ia pote crea armas cual ia es multe plu forte e barata.

La impero hitita ia deveni un vitim de la colasa de la eda de bronze sirca la comensa de la sentenio 12 aec. Dinastias de hititas etnica ia survive en renas peti sperdeda tra Suria, Lubnan, e Israel moderne. Sin un continui uninte, sua desendentes ia es sperdeda e ia conflue per deveni la popla moderne de Turcia, Levante, e Mesopotamia.

La problem de la orijin de la Hititas es un sujeto de controversia. Temprana, lo ia es sujesteda ce los ia ariva de la areas ueste de la Mar Negra, ma esta teoria no acorda con evidentes arceolojial. Un otra teoria ia sujeste ce los ia ariva a Anatolia de la norde-este, con la idea ce un linia de vilas en acel area ia es ardeda o abandonada en la sentenio 20 aec. Ma plu rexerca arceolojia no suporta la idea de un armada invadente, destruinte la vilas en sua via e estraente sua popla. La impresa es plu de un penetra pasosa, conduinte par grados a un monopolio de potia political.

De sua apare prima entre la Anatolianes orijinal, la Hititas ia pare como interatante libre, e la prestijia de la lingua ia repone gradal la hatian. Algas sujeste ce Anatolia ia es la abitada orijinal de la hititas, e ce los ia es la fonte de la indo-europeanes pos sirca 7000 aec, traente sua lingua e la inventa de cultiva. Ma on ave multe bon razonas per rejeta esta teoria. La plu probable es ce la hititas e sua relatas ia veni de la vale de la Rio Cuban a la norde de la Caucasos e la cultur de Maicop ala.