Cultur Maicop

De Vicipedia
Jump to navigation Jump to search
Mapa de la cultur Maicop
Fix:R3 2 2d eneolith bull.jpg
Bove de oro, de un curgan de sirca la milenia 4

La cultur Maicop (de rusce майкоп, sirca 3700 aec a 3000 aec) ia es un cultur arceolojial major en la rejion de la Caucasos en Rusia sude. Lo estende longo un area de la Penisola Taman a la Streta Certx a prosima a la borda moderne de Dagestan e a sude a la Rio Cura. La cultur es nomida per la entera reial trovada en la curgan Maicop en la vale de la Rio Cuban.

A la sude, lo borda a la cuasi contempora cultur Kura-Araxes (3500 a 2200 aec), cual estende en Anatolia este e ia influe lo probable. A la norde es la cultur Iamna, incluinte la cultur Novotitorovca (3300 a 2700 aec),

La Rio Kuban es navigable per multe de sua longia e furni un pasaje par acua fasil a la Mar Azov e la teritorio de la cultur Iamna, longo la Rio Don e Rio Donets. La cultur Maicop ia es tal bon situada per esplota la posibles de comersia con la area de Ucraina sentral.

Marcas de la cultur mostra un similia con alga otra cultures de la area. Per esemplo, alga ojetos fabricada es simil a los trovada en escavas de la site antica de Tel Khazneh en Suria norde, sirca 4000 aec. La descovre de la cultur Leyla-Tepe en Azerbaijan sude, 4350 a 4000 aec, ia indica alga similes. Enteras simil ia es trovada en la cultur de entera en amforas de Sacartvelo ueste. E la cultur ia es liada a la monumentos de la periodo Ubaid norde en Anatolia este.

En 2010, cuasi 200 locas de la eda de bronze ia es reportada, estendente plu ca 90 km de la Rio Cuban a Naltxic a un altia entre 1400 e 2400 metres. Los ia mostra construi seguente la mesma desinia arcitetal, con un patia oval en la sentro, e juntada par ruas.

La tradisiones de entera de la cultur Maicop ia es tipal indoeuropean, pd en un caveta, a veses foreda con petra, e covreda con un curgan (tumulo). Plu tarde, la curganes ia es recambiada par montones de roca. La curganes ia es multe rica con fabricadas de oro e arjento, noncomun en acel eda.

Arte[edita | edita la fonte]

En la sentenio 20 temprana, rexercores ia mostra la esiste de un stilo animal de Maicop en la cosas trovada. Esta stilo es la prototipo per la stilos animal de cultures plu tarde. Lo ia es plu ca un mil anios plu vea ce la stilos animal de la scitas, sarmatianes, e celtas. Ance atribuida a la cultur Maicop es petroglifos cual no es ancora desifrida.

Cavalos[edita | edita la fonte]

La popla de Maicop ia ave un modo de vive fisada, e cavalos ia es un persento minimal de sua bestias, cual ia es composada xef de porcos e boves.

Ma arceolojistes ia descovre un forma unica de partes ladal de morsos de bronze, cual es fabricada de un bara de bronze con un anelo torseda en la media cual fili tra la nodos e junta a la brida, cabestro, e banda de testa. Indentes e bultos a la bordas de la partes ia es, probable, per ajunta coreas per la nas e labio inferior

Alga de la rotas de carones la plu temprana en la mundo ia e trovada en la area de la cultur Maicop. La du rotas de lenio solida de la curgan de Starocorsunscaia en la rejion de la Cuba ia es datida a la dui du de la milenio cuatro.

Cultiva[edita | edita la fonte]

La construi de terazas en la montes es evidentes de sua modo de vive fisada, cuantia grande de popla, e capasias alta de cultiva e tecnolojia. La terazas ia es construida sirca la milenio cuatro aec, e tota cultures seguente ia usada los per cultiva. La majoria grande de vasos trovada sur la terazas ia es de la periodo Maicop, e la resta de la periodo de scitas e alanes. La terazas de Maicop es entre la plu antica en la mundo, ma los no es multe studiada. La eda grande de los - plu ca 5000 anios - causa ce espertas considera ce sua construores ia es injenores e artisanes nonsurpasada.

Origins[edita | edita la fonte]

On ave multe teorias sur la orijin de la cultur Maicop. La suportores de la ipotese curgan de Marija Gimbutas vide lo como un introdui de la indoeuropeanes de la stepe en la Caucasos. An si alga evidentes no suporta esta idea, otra evidentes sujeste relatas a la cultures plu ueste.

J.P. Mallory ia sujeste ce la cultur es, a min, un fusa de du cultures: un de la steppes local, abrasada par la cultur Novosvobodna, e elementos stranjer de sude de la Caucasos.

Mariya Ivanova ia sujeste ce, an si la cultur temprana ia mostra indicas de un cultur de la steppe, la cultur pos la milenia cuatro mostra un cultur plu sofistica, cual es plu probable importada de la area de Iran.

Najaf Museyibli ia sujeste ce la descovre de curganes multe antica en Azerbaijan, ance de la comensa de la milenia cuatro, indica ce la cultur Leylatepe es la fonte de la cultur Maicop.

Ultima, la misca continuante de influes cultural en la area sujeste ce la fonte de la cultur Maicop pote es un popla orijinal cual ia adota pesas de la cultures cual ensirca lo.

Referes[edita | edita la fonte]

Mariya Ivanova (2007). "The Chronology of the "Maikop Culture" in the North Caucasus: Changing Perspectives". Armenian Journal of Near Eastern Studies. II: 7–39.
J. P. Mallory, "Maykop Culture", Encyclopedia of Indo-European Culture, Fitzroy Dearborn, 1997.
Najaf Museyibli, Excavations of Soyugbulaq Kurgans, Azerbaijan Republic National Academy of Sciences, Institute of Archaeology and Ethnography. Baku, Azerbaijan 2008