Via Letin

De Vicipedia
La Via Letin de la Deserto de Nevada
Un desinia mostrante la Via Letin de supra, con la brasos indicada

La Via Letin es la galasia cual conteni nosa sistem de Sol. La ajetivo "letin" espresa la aspeta cuando videda de Tera - un banda de lus formida par stelas cual no pote es distinguida par la oio nuda. La espresa es es un tradui de la latina via lactea, de la elinica γαλαξίας κύκλος (galaxías kýklos, "sirculo letin"). Lo pare como un banda car sua strutur formida como un disco es videda de en se mesma. Galileo Galilei es la siensiste ci ia es prima capas de vide stelas individual con sua telescopio en 1610. Asta la desenio 1920, la plu de astronomistes ia crede ce la Via Letin contenida tota la stelas en la universo. Seguente la "debate grande" de 1920 entre la astronomistes Harlow Shapley e Heber Curtis, oservas par Edwin Hubble ia demostra ce la Via Letin es sola un de multe galasias.

La Via Letin es un galasia spiral con brasos, con un diametre entre 100 mil e 180 mil anios de lus. Lo es estimada como conteni entre 100 e 400 bilion stelas. On ave probable a min 100 bilion planetas en la Via Letin. La sistem de Sol es en la disco, sirca 26 mil anios de lus de la sentro galasial, a la borda interna de la braso Orion, un de la consentras spiral de gas e polvo. La stelas en la parte la plu interna de 10 mil anios de lus formi un bulto e brasos cual radia de la bulto. La sentro galasial es un fonte de ondas radio nomida Sajitario A*, probable un buco negra supramasosa.

Stelas e gases a distantias variosa de la sentro galasiales orbita a sirca 220 cilometres per secondo. La rapidia de la jira constante contradise la leges de dinamica de Kepler, e sujesta ce la plu de la masa de la Via Letin no emete o asorbe radia eletromagnetica. Esta masa ia es nomida "materia oscura". La periodo de jira es sirca 240 milion anios a la loca de la Sol. La Via Letin intera move a un rapidia de sirca 600 cilometres per secondo relatante a un strutur de refere estragalasial. La stelas la plu vea en la Via Letin es cuasi tan vea como la universo se mesma, e donce ia formi probable un tempo corta pos a edas oscur de la Buma grande.

La Via Letin ave alga galasias satelitin e es un parte de la grupo local de galasias, cual formi un arte de la supragrupo Virgo, cual es se mesma un parte de la supragrupo Laniakea.


La sistem solal model
Planetas: Mercurio | Venus | Tera (Luna) | Marte | Jupiter | Saturno | Urano | Netuno
Planeta nana: Ceres | Pluto | Eris
Otras: Sol |Stela | Sintur de asteroides | Galasia | Nebulosa | Buco negra | Buma grande