Galileo Galilei

De Vicipedia

Galileo Galilei (1564–1642) ia nase en Pisa, Italia, a 18 febrero 1564, en la mesma anio como la nase de William Shakespeare e a la mesma dia como la mori de Michelangelo. Cuando el ia ave 18 anios, el ia descovre la prinsipe de la pendulo. A 22 anios, el ia inventa la balansia idrostatical. En 1610, pos perfeti sua telescopio, el ia descovre cuatro de la nove lunas de Jupiter (la lunas de Galileo), la anelos de Saturno, e la fases de Venus.

El es la plu famosa per descovre la lege de gravita, cual dise ce du cosas con la mesma grandia e forma, ma con pesas diferente, cade a la mesma rapidia tra la mesma media. Lo es probable un mito ce el ia mostra esta lege par cade cosas de la tore apoiante de Pisa.

En filosofia, el ia es la person prima ci ia distingui entre cualias prima e cualias du, un idea multe importante per filosofia engles. Cualias prima es cualias de materia cual pote es mesurada, e donce pote es la sujetos de siensa. Cualias du, a la otra lado, es cualias cual nesesa un vivente consensa, cualias como gustas, odores, colores, sonas, etc. Siensa pote esamina esta cualias sola si los pote es cambiada a cualias prima.

Galileo ia crede ce la teoria de Copernico es vera, e ia instrui otras sur esta. La eglesa, a contra, e spesial la Jesuistes, ia pote sola aseta esta si lo es presentada como mera un ipotese, en la mesma modo como alga fundalistes tolera oji la instrui de evolui sola si lo es presentada como mera un teoria entre multe otras.

Galileo ia indica a sua oposores ce on la Biblia no debe es leteral interpreteda. Si un person leje lo en esta modo, el va trova multe asurdas e contradises. La biblia, el ia dise, debe es lejeda en modo metafor. La eglesa no ia gusta esta. A su es du sitas de un nota cual Galileo ia scrive a Cristina, la duxesa grande de Toscana:

...No cosa fisical cual la esperia de la sensas pone ante nosa oios, o cual esperimentas nesesada demostra a nos, debe es demandada (an min condenada) sur la atesta de frases biblial cual pote ave alga otra sinifia su sua parolas.

...Me no senti obligada a crede ce acel mesma Dio, ci ia furni sensas, razona e inteleto a nos, ia intende ce nos asteni de usa los.

(tradui de The Age of Reason, par Will e Ariel Durant, orijinal de Galileo's Discoveries and Opinions, par Stillman Drake)

En 1616, la Investiga ia dise a Galileo ce el nesesa para ensenia la teoria de Copernico, e condena tota publicis e libros par tota autores ci presenta la teoria en esta modo. Galileo, cisa recordante la fortuna de Bruno a sola 16 anios a ante, ia deveni plu silente. Un article par un de sua studiantes iia mali la situa, e Galileo ia parla con la Papa mesma. Ma la Papa no ia cambia sua opina.

Galileo ia completi sua libro sur la teoria de Copernico an tal, ma ia presenta lo como un ipotese, en la forma de un conversa entre los ci suporta e los ci condena lo. Ma el ia nomi la parlor anticopernico "Simple", e la Jesuistes ia ataca la libro. Los ia dise ce Galileo es plu perilosa per la eglesa ca Luther o Calvin!

A 68 anios, en cuatro investigas, el ia es menasada con tortura e la Investigores ia esije ce el retira sua ideas. Galileo ia refusa, ma un poca min a cada ves. Los ia declara ce el es culpable de eresia. El ia es restrinjeda a sua casa, ma libre per instrui e scrive. El ia es multe fortunosa.

Galileo ia mori a 8 janero 1642. Siensa ia sufri un colpa grande en la paises catolica, e multe siensistes ia teme repete sua ideas. La sentro de descovre siensal ia move a la paises norde e protestante, no car protestantisme ia es plu tolerante, ma car la eglesas de la paises norde ia ave min autoria legal. En 1835, la eglesa ia sutrae sua libros de la lista de libros nonpermeteda. La eglesa ia desculpa el en 1999.