Stela

De Vicipedia
Jump to navigation Jump to search
Un viveria stelal

Un stela es un tipo de cosa astronomial formida como un sferin luminosa de plasma, retenida par sua gravita propre. La stela la prosima a tera es la sol. Multe otra stelas es vidable a la oio nuda de tera entra la note, aparente como un multia de puntos luminosa e fisada en la sielo par causa de sua distantia enorme de la tera. Istorial, la stela la plu fasil persepable ia es grupida en costelas, e la plu luminosa ia gania nomes propre. Astronomistes ia asembla catalogos de stelas cual identifia la stelas conoseda, e furni nomes ofisial per los. Ma la plu de stelas en la universo, incluinte tota stelas estra nosa galasia - la Via Letin - es nonvidable a la oio nuda de tera. Vera, la plu de stelas es nonvidable an con la telescopios la plu forte.

Per un parte minima de sua vive, un stela brilia par la fusa termonucleal de idrojen a elio en sua cor, relasante enerjia cual traversa la interna de la stela e alora radia a spasio. Cuasi tota elementos plu pesosa ca elio e cual aveni natural, es creada par nucleosintese stelal entra la vive de la stela, e par la esplode de alga stelas par nucleosintese supranoval. Prosima la fini de sua vive, un stela pote ance conteni materia dejenerada. Astronomistes pote determina la eda, masa, composa cimical, e multe otra cualias de un stela par oserva sua move tra spasio, sua luminosia, e spetro. La masa intera de un stela es la rol major cual determina sua evolui e destina ultima. Otra cualias de un stela, como diametre e temperatur, cambia tra sua vive, en cuando la ambiente de la stela afeta sua rota e move. Un grafi de la temperatur de multe stelas contra sua luminosias produi un graf nomida la scema Hertzsprung-Russell. Grafi un stela spesifada sur la scema permete ce on determina la eda e state de evolui de acel stela.

La vive de un stela comensa con la colasa gravital de un nebulosa gasosa de materia composada xef de idrojen, con elio e cuantias peti de elementos plu pesosa. Cuando la cor es sufisinte densa, la idrojen deveni constante convertida a elio tra fusa nucleal, relasante enerjia. La resta de la interna de la stela porta enerjia a via de la cor par la pasa de calda par radia e conveta. La presa interna de la stela preveni lo de colasa plu su sua gravita. Un stela con un masa plu ca 0.4 par lo de la sol, va crese e deveni un jigante roja cuando la combustable en sua cor es consumada. En alga casos, lo va fusa elementos plu pesosa a la cor o en cascas sirca la cor. En cuando la stela crese, lo lansa un parte de sua masa, ricida par la elementos plu pesosa, a la ambiente interstelal, per es resiclida plu tarda como stelas nova. Entratempo, la cor deveni un resta stelal, pd, un nano blanca, un stela neutronal, o, si sufisinte masosa, un buco negra.

Sistemes de stelas duple o multiple es composada de du o plu stelas cual es liada par gravita e move sirca lunlotra en orbitas stable. Cuando du stelas como estas ave orbitas sufisinte prosima, sua interata gravital pote ave un efeto forte sur sua evoluis. Stelas pote formi, par gravita, un parte de un strutur multe plu grande, como un cumulo de stelas o un galasia.


La sistem solal model
Planetas: Mercurio | Venus | Tera (Luna) | Marte | Jupiter | Saturno | Urano | Netuno
Planetas del Sistema Solar a escala..png
Planeta nana: Ceres | Pluto | Eris
Otras: Sol |Stela | Sintur de asteroides | Galasia | Nebulosa | Buco negra | Buma grande