Tafl

De Vicipedia
Jump to navigation Jump to search

Tafl es la nom de un familia de juas stratejial nordica e celta, juada sur un table de cuadros o punto, con du armadas de un cuantia de pesos nonegal, tipal con un proportio de un a du. Los ia es probable fundida sur la jua roman de ludus latrunculorum. La juas ia es juada en Noria, Sveria, Danmarc, Island, Britan, Er, e Sami. La juas tafl ia es ultima reponeda par xace en la sentenio 12, ma un varia de la popla sami - tablut - ia es ancora juada asta a la min la sentenio de 1700. La regulas per tablut ia es rejistrada par la naturaliste svensce, Carol Lineo, en 1732, e estas ia es traduida de latina a engles en 1811.

La parola "tafl", de la parola norsce vea per table, es la nom orijinal. Per la eda de vicinges, la nom ia deveni hnefatafl, cual sinifia "table de la punio", per difere lo de otra juas ance nomida "tafl", como skaktfl (xace), kvatrutafl (tables, como trictrac), e halatafl (juas de volpe). La parola hnefi (punio) refere a la re en la jua.

Varias[edita | edita la fonte]

Estra tablut, no descrive completa o nonambigua de la regulas ia survive, ma la prinsipes jeneral es conoseda.

Brandubh (eres per corvon negra) ia es la forma eres de tafl. De du poesias, nos sabe ce lo ia es juada a un table 7 par 7, con 5 omes contra 8, e un de la sinco ia es un branan o xef.

Ard Ri (gailica per re alta) ia es la varia de Scotland, ance juada sur un table 7 par 7, ma con 8 defendores contra 16 atacores.

Tablut, la varia de la sami notada a supra, es bon arcivida e ia es ancora juada en la sentenio 18 e an en la sentenio 19. Lo ia es descriveda par P.A. Lindholm, en 1884, como un "xace" entre la svensces e la rusces o moscvanes.

Tawlberdd ia es juada en Cimri. Lo es descriveda como juada con 8 pesos a la lado de la re, e 16 a la lado de la atacores. Robert ap Ifan ia arcivo lo, con un desinia, en un manoscrito de 1587. Sua varia ia usa un table 11 par 11, 12 pesos per la defendores, e 24 pesos per la atacores.

Hnefatafl ia es un jua popular en Scandinavia medieval de sirca 700 a 1000 ec, e la es notada en alga de la sagas norsce. Lo es posible ce los usa dados en alga modo en la jua. La jua ia deveni ance popular en la areas concistada o colonida par la vicinges, spesial en Britan e Rusia. Lo ia es juada sur un table de 11 par 11 o 13 par 13.

Alea evangelii, cual sinifia "jua de la evanjelios" en latina. Lo ia es descriveda, con un desinia, en un manoscrito de la sentenio 12, ce la Universia de Corpus Christi en Oxford en England anglosason. Lo ia es juada a la puntos de crusis de un table de 18 par 18 (o de 19 par 19 cuadros).

Regulas[edita | edita la fonte]

Du juores con un hnefitafl e otra juas antica a un feria "medieval"

La regulas per la familia es xef derivada de la jua tablut, la sola varia ancora juada

  • Tota de la varias comensa par pone la pesos seguente un de la modeles a supra. Un armada comensa prosima a la bordas de la table; la otra comensa sirca la re, cual ocupa la cuadro sentral (la "castel");
  • La gol de la jua difere per la du juores. La armada de la re gania par move la re a un de la bordas. La armada atacante gania par catura la re.
  • Cualce peso pote move cualce cuadros vacua en un linia ortogonal [←↑→↓], ma no diagonal. En sua moves, pesos no pote pasa supra un otra peso en sua via.
  • Un peso de juor A es caturada e sutraeda de la table si la juor B move un de sua pesos afin la peso de A deveni encluida a du lados oposada (orizonal o vertical) par du pesos de B. Ma un peso pote entra entre du pesos enemin sin es caturada.
  • La re es ance caturada en esta modo.

En tablut, otra regulas esiste regardante la castel:

  • La castel vacua pote ata como un peso amin (per cada juor) cuando on catura un peso enemin par enclui lo entre la castel e un peso amin. Esta es ance tal si la re es ancora en la castel.
  • Si la re es en la castel, el no pote es caturada asta el es ensircada par cuatro pesos enemin.
  • Pesos (estra la re) pote move tra la castel (si vacua), ma no pote para a lo.

Tradisional, juores debe averti lunlotra si los pote gania en un turno, simil a dise "xace" o "xacemata".

On ave multe controversas conserna la nonegalia posible de la jua, car la regulas per alga varias vantaje la defendores de la re. Alga cambias de regulas ia es sujestada per aida egali la jua. Los inclui la idea de un re "sin armas", pd el no pote catura pesos enemin, e la idea ce la re debe ateni un de la cuatro angulos de la table, en loca de la bordas.