Reunion

Reunion es un isola en la Mar Indian, este de Madagasicara e 175 km sude-ueste de Mauris. Lo es un parte ultramar de la Republica de Frans. La popla refere a se como reuniones, e la cuantia de popla ia es 859,959 per janero 2020.

La isola es 63 km longa, 45 km larga, e covre 2512 km2. Lo es supra un loca calda en la crosta de Tera. La Piton de la Fournaise, un volcan a la lado este de Reunion, es plu ca 2631 metres supra la nivel de mar. Lo ia eruta plu ca 100 veses de 1640, e es constante monitorida. Lo ia eruta la plu resente a 2 april 2020. Un volcan dorminte, la Piton des Neiges, es la punto la plu alta sur la isola a 3070 metre supra la nivel de mar.

La clima de Reunion es tropical, ma la temperatur modera con altia. La clima es fresca e seca de maio a novembre, ma calda e pluvosa de novembre a april.

Reunion es la abita de un varia de avias como la feton (Phaethon lepturus o paille en queue) con beco orania e coda blanca. La animal teran la plu grande es la camaleon panterin (Furcifer pardalis). La costa ueste es ensircada par un resife de coral grande cual es la abita de eriso-de-mares, congros (angilas grande), e pexes lorin. Tortugas de mar e delfines ance abita la mar a costa. megateros (balenas) migra a norde a la isola de la acuas antartica anial en la inverno de la emisfera sude (junio a setembre) per reprodui e come, e pote es oservada de la costa de Reunion en esta saison. De la spesies de animales cual ia es nativa a Reunion, 19 ia deveni estinguida seguente coloni par umanas. Per esemplo, la tortuga jigante de Reunion ia deveni estinguida pos es masacrada en cuantias grande par marinores e colonistes.

Mercatores arabi ia es familiar con la isola par la nom Dina Morgabin ("isola ueste"). La descovre prima par europeanes ia aveni sirca 1507 par la esploror portuges Diogo Fernandes Pereira. La isola ia es continuante abitada de la sentenio 16, cuando popla de Frans e Madagasicara ia coloni ala.

De la sentenio 17 a 19, coloni par franseses, con la emporta de africanes, xineses, e indianes como laborores, ia contribuida a la diversia etnical en la popla. De 1690, la plu de non-europeanes ia es sclavida. Sclavia ia es abolida a 20 desembre 1848 (un dato selebrada anial a la isola), cuando la Republica Franses du ia deslegali sclavia en la colonias franses. Pos esta, multe laborores stranjer ia veni como laborores obligada. Laborores obligada ia continua es traeda a Reunion de India sude, entre otra locas. La isola ia deveni un parte ultramar de Frans en 1946.

Etnicos presente inclui popla de orijinas african, indian, european, malagasi, e xines. Tota grupos cual composa la isola es migrantes de otra paises tra la sentenios; on no ave un popla nativa sur la isola, e lo ia es orijinal nonabitada. La poplas ia misca de la dias prima de la istoria colonial de la isola. Per esemplo, la colonistes franses prima ia sposi femes de Madagasicara e de erita indo-portuges. La resulta es ce la majoria de persones en Reunion es de raza miscada e de un cultur "creol". La cultur reuniones es un misca de la tradisiones european, african, indian, xines, e los de isolas tropical jeneral.

La relijio xef es cristiania, spesial catolicisme roman. Los es 86.9% de la popla, segueda par induistes (6.7%) e muslimes (3.2%). Relijios tradisional de Xina e Budisme es ance representada.

Franses es la sola lingua ofisial de Reunion. An tal no ofisial, creol reuniones, cual deriva de franses e sembla la creoles de la Sexeles e Mauris, es la lingua nativa de la parte la plu grande de la popla, e es parlada con franses, cual servi como la lingua de educa e comersia.

La Cirque de Mafate es un caldera formida de la colasa de la volcan la Piton des Neiges
La reposa de la sol a la plaia de Grande Anse
La plaia de L'Étang-Salé - un plaia de arena negra de basalto volcanal
Furcifer pardalis (mas) - la camaleon panterin
La Eretmochelys imbricata un tortuga de mar entretexeda
la Phaethon lepturus, un feton con beco orania e coda blanca
Un om reuniones ordinante vanilia borbon