Feton

De Vicipedia
Un feton de la Sexeles
Un feton con beco roja
Un feton enfante de la Sexeles

Fetones es un familia - Phaethontidae - de avias de mar alta tropical. Los es la sola representores de la ordina Phaethontiformes. Per multe anios, los ia es videda como parte de la Pelecaniformes, ma jenetica ia indica ce los es relatada plu prosima a la Eurypygiformes. On ave tre spesies en un jenero, Phaethon. La nomes siensal es derivada de elinica phaeton ("sol"). Los ave tipal plumas blanca con plumas de coda longa e gamas e pedes peti e debil.

Fetones es sirca 76 a 102 cm de longia, e 94 a 112 cm de estende de la alas. La tre spesies ave combinas diferente de marcas negra sur la fas, dorso, e alas. Sua becos es grande, potiosa, e alga descurvida. Sua testas e grande e sua colos es corta e densa. Sua pedes ave tota cuatro ditos liada par un rede. La gamas es locada a pos de sua corpos, cual resulta en los no ave la capasia de pasea. Los pote move sur tera sola par puxa se a ante con sua pedes. Fetones catura sua preda par flota en aira e alora tufa, tipal sola tra la strato surfas de la acua. Los come xef pexes, spesial pex volante, e a veses calamares.

Fetones es xef solitar o en duples a via de la colonias reproduinte. Ala, los partisipa en mostras corteal. Per alga minutos, grupos de 2 a 20 avias vole simultan e repetente sirca lunlotra en sirculos grande vertical, en cuando brandi sua bandas codal de un lado a un otra. La clama de la feton es tipal un sibila forte, perforante, xiliante, o un crepita. Estas es comun presentada en un serie rapida cuando los es en la vola mostrante a la colonia. Si un fema gusta la mostra, el va copula con la mas en la loca futur de sua nido. A veses, disputas aveni entre mases atentante proteje sua sposas e nidos.

Fetones nidi jeneral en cavetas o fesures a la sola nuda. La fema produi un ovo blanca con puntos brun, e incuba lo per 40 a 46 dias. La incuba es fada plu comun par la fema, en cuando la mas trae comedas per la fema. La enfante emerji con peluxeta gris. Lo va resta solitar en la nido en cuando ambos jenitores xerca per comedas, e los va nuri la enfante du veses cada tre dias asta la enfante pote vole, sirca 12 A 13 semanas pos emerji. La jovenes no es capas de vola a prima; los va flota sura la mar per alga dias per perde alga pesa ante vole.