Megatero

De Vicipedia
Un megatero
Un megatero rompente tra la surfas
Un megatero madre e enfante
La sceleto de un megatero

La megatero (acc balena con jiba, Megaptera novaeangliae) es un spesies de balena vera. Lo es un de la plu grande de la spesies de rorcuales, con adultes de 12 a 16 metres de longia, e pesa sirca 25 a 30 tones (ton = mil kg). La megatero ave un forma distinguinte, con pinas ladal longa e un testa botonosa. Lo es notada per sua condui a la surfas de acua, cual atrae oservores de balenas. Mases produi cantas complicada cual dura 10 a 20 minutos, cual los repete per multe oras a un ves. Tota mases en un grupo produi la mesma canta, cual difere de cada saison. La intende no es clar, ma lo pote aida indui estro en la femes.

Trovada en mares tra la mundo, megateros tipal migra asta 25,000 km cada anio. Los come en acuas polal, e migra a acuas tropical o sutropical per cortea e pare, en cuando los juna e nuri se de sua reservas de gras. Sua dieta es composada xef de cril e pexes peti. Los ave un colie de metodos per come, incluinte la tecnica de la rede de bolas: un grupo de megateros produi bolas su e sirca un manada de pexes peti, forsante los a lunlotra per fasil come per tota.

Como otra balenas grande, la megateros ia es un blanco per la industria de xasa de balenas. La spesies ia es a un ves a la borda de estingui. Sua cuantia ia cade par un estima de 90%, ante un suspende de xasa en 1966. Cuantias ia recovre a sirca 80,000, ma marania en redes de pexores, colides con barcones, e la contamina par ruido, continua afeta la spesies.

Megateros pote es fasil identifiada par sua corpo spesa, jiba evidente, color negra a dorso, e pinas petal longa. La testa e mandibula es covreda par botones nomida tuberculos, cual es foliculos de capeles e es un cualia marcante de la spesies. La aleta de coda, cual tipal leva supra la surfas cuando tufante, ave bordas ondosa.

Megateros ave 270 a 400 barbas de balena a cada lado de sua bocas. La barbas es laminas de 46 cm a la anterior a sirca un metre a la posterior, pos la xarnier. Fesures ventral core de la mandibula a la ombilico, sirca dui la distantia longa la ventre. Estas es min multe ca en otra rorcuales, ma es alga larga.

Mases matur ave un longia promedia de 13 a 14 metres; femas es alga plu grande, de 15 a 16 metres. La femas ave un lobe emisfera sirca 15 cm de diametre en sua area jenital, cual distingui la sesos vidal. La penis de la mas resta ascondeda en la ranur jenital.

Cortea aveni en la menses de inverno, seguente migra a la ecuator de la areas per come en la estate plu prosima a la artica. Compete entre la mases es comun ferosa. Mases nonrelatada comun segue femas e an duples de femas con sua enfante. Mases colie en grupos competente sirca un fema e combate per la direto per copula con la fema. La grandia de la grupos crese e descrese pos la retrae de mases nonsusedente e la ariva de otras. Entre la conduis de cortea e compete par la mases es la alti vertical de la surfas (engles: skyhopping), la colpa con la coda (lobtailing), la "amar" (peduncle throw), la colpa con pinas ladal (pectoral slap), en ajunta a la moves plu clar, como atacas e contramoves.

La cantas de balenas pare ave un rol importante en indui estro en femas e en la eleje de acompaniores. Ma lo es ance usada entre mases per mostra domina. Megateros es poliandrial, con un fema ave multe acompaniores mas tra a curso de sua vive. Femas tipal reprodui cada du o tre anios. La periodo de jesta es 11.5 menses. La menses plu comun per pare es janero e febrero en la emisfera norde, julio e agosto en la emisfera sude. Femas pausa per un o du anios ante reprodui denova.