Camaleon

De Vicipedia
Un camaleon indian (Chamaeleo zeylanicus)
Un camaleon indian negrida pos es asustada
La camaleon con nas longa (Calumma gallus)
Camaleon de Madagasicara
Un camaleon estendente sua lingua per catura un inseto

Camaleones (familia Chamaeleonidae) es un grupo spesialida de lezardos de la mundo vea, con 202 spesies. La nom deriva de la elinica χαμαιλέων, un composa de χαμαί ("sur la solo") e λέων ("leon").

Camaleones varia multe en grandia e strutur, con longias de 15 mm a 68.5 cm. Camaleones es distinguida par sua pedes, con du ditos a ante e du ditos a pos. Los ave linguas multe adatada e rapida estruida. Los move con un pasea osilante. Alga ave crestas o cornos sur sua fronte e nas. Multe spesie es dimorfe: mases es tipal plu ornada ca femas. La plu spesies ave un codo prensil. La oios de la camaleon pote move autonom, ma pote foca a ante cuando xasante.

Camaleones es adatada per trepa e xasa vidal. Los abita en areas calda de forestas pluvosa a desertos, con spesies variosa en Africa, Madagasicara, Europa sude, e tra Asia sude tan distante como Srilanca. Los ia es introduida a Hawaii, California, e Florida, e es comun domada. Multe spesies de camaleones es menasada par estingui. Cuantias declinante es la resulta de perde de abitadas.

La camaleones ave oios la plu distinguinte de cualce retil. La palpebras alta e basa es juntada, con sola un fora sufisinte grande afin la pupil pote vide. Cada oio pote pivote e foca autonom, cual permete ce camaleones pote vide du ojetos diferente simultan. Esta dona a los un arco de vide 360 grados. Predas es locada par persepi monoculal, no par persepi binoculal. Camaleones ave multe bon vide per retiles e pote vide insetos peti de un distantia de 5 a 10 metres. Los ave la grandi la plu alta de cualce vertebrato. Plu, los pote vide en lus vidable e ultravioleta. Camaleones esposada a ultravioleta mostra un crese en condui sosial e niveles de ativia, tende plu a pigri e come, e tende plu per reprodui car ultravioleta ave un efeto positiva a la glande pineal.

Como serpentes, camaleones no ave un orea esterna o media, e donce los no ave un abrida per la orea o un tambur oreal. Ma los no de sorda; los pote deteta frecuentias de sona en la estende de 200 a 600 Hz.

Tota camaleones es xef insetivores cual come par projeta sua linguas longa de sua bocas per catura predas locada a alga distantia. La linguas es comun pensada como 1.5 veses la longia de sua corpos (con codo), ma la spesies peti ave linguas an plu longa proportial.

Alga camaleones pote cambia la color de sua peles. Algas varia sua color e motif tra combinas de ros, blu, orania, verde, negra, brun, blu pal, jala, turcesa, e purpur. Sua pel ave un strato surfasal cual conteni pigmentos, e sua la strato es selulas con cristales de guanina. Lo cambia color par cambia la spasio entre la cristales, cual cambia la longia de ondas de lus refletada de la cristales.

Cambia de colores en camaleones ave funsionas en camofla, ma es plu comun en siniali sosial e en reatas a temperatur. La importa de esta funsionas varia con la situa e la spesies. La cambias siniali la state fisiolojial de la camaleon e sua intendes a otra camaleones. Car camaleones es ectotermal, un otra razona per cambia color es per regula la temperatur de sua corpos. Un color sombre resulta en la asorbe de lus e caldia per leva su temperatur; un color plu pal refleta lus e caldia, cual stable e descrese sua temperatur. Camaleones tende mostra colores plu briliante cuando mostra un ataca a otras, e plu sombre cuando los sede a otras.