Preistoria de la popla PIE (Teoria Anatolian)

De Vicipedia
Jump to navigation Jump to search
Un mapa de la estende de la tecnolojia de cultiva en Europa

La Teoria Anatolian de la preistoria de la popla PIE (proto-indo-european) ia es developada par la arceolojiste brites Colin Renfrew en 1987. Lo sujeste ce la parlores de PIE ia abita en Anatolia (Turcia moderne) en la eda neolitica, e ce la distribui de la linguas istorial indo-european es la resulta de la estende en la revolui neolitica de la milenios sete e ses aec. Lo es la teoria competente xef de la Teoria Curgan, cual es plu favorida par academistes.

Esta teoria sujeste ce la linguas indo-european ia comensa sperde pasosa, par difusa de popla a Europa de Asia sude-ueste de sirca 7000 aec con la avansa neolitica de cultiva. La estende de cultiva de Asia sude-ueste ta resulta en tre famlias de linguas: linguas indo-european a Europa, linguas dravidian a Pacistan e India, e linguas afro-asiatica a Arabia e Africa norde.

Pos ce la teoria ia es criticada, Renfrew ia revisa sua teoria par sujeste ce la lingua de Anatolia en 7000 aec ia es pre-proto-indo-european, e resultante direta sola con la linguas anatolian, e ce orijina de la proto-indo-europeanes propre ia ave la Balcanes per sua abita orijinal sirca 5000 aec. El ia identifia esta cultur con la "cultur european vea", proposada par Gimbutas como un cultur non-PIE.

La reconstruis de un sosia PIE de la Eda de Bronze, fundida sur pesos de vocabula como "rota", no pare es valida per la ramo anatolian, cual apare ia separa a un paso temprana, ante la inventa de veculos con rotas. Seguente Renfrew, la sperde la indo-european prosede en esta pasos:

Sirca 6500 aec: Pre-proto-indo-european, en Anatolia, fende a anatolian propre e PIE antica, la lingua de la cultivores ci ta migra a Europa en la sperde inisial de cultiva. Esta linguas estende en la Balcanes (cultur Starčevo), en la vale de la Rio Danubio (cultur de vasos de bandas), e posible en la area de la Rio Bug e Rio Dnistr (la cultur de vasos de bandas este).

Sirca 5000 aec: La PIE orijinal fende a indo-european norde-ueste (la asendente de italica, celtica, e germanica) en la vale de la Rio Danubio, la PIE de la Balcanes (la cultur european vea de Gimbutas), e la PIE temprana de la stepes (asendente de la linguas tocarian). La forte de la teoria es en sua ia de la sperde de la linguas indo-european con un aveni comprendeda par arceolojia - la sperde de cultiva - cual academistes comun suposa ia envolve moves sinifiante de poplas.