Linguas dravidian

De Vicipedia
Jump to navigation Jump to search
La sufamilias de la linguas dravidian

La linguas dravidian es un familia de linguas parlada xef en India sude e partes de India este e sentral, e ance en Srilanca e poxes peti en Pacistan sude-ueste, Afganistan sude, Nepal, Bangladex, e Butan. La linguas con la plu parlores es telugu, tamil, canada, e malaialam. On ave ance grupos peti de tribus cual parla linguas dravidian, como la curuc en India este e gondi en India sentral. La linguas dravidian es parlada par plu ca 215 milion persones en India, Pacistan, e Srilanca.

An si alga eruditas ia sujeste ce la linguas ia es traeda a India par migras de Asia sude-ueste en la milenio cuatro o tre o an plu temprana, la linguas no es fasil liada a cualce otra familia de linguas, e pote bon es nativa a India.

La linguas dravidian ia es atestada de la sentenio du aec en scrives tamil-brami sur la mures de cavas descovreda en Tamil Nadu. Sola du linguas dravidian es parlada sola estra India: Brahui en Balotxistan, e Dangar, un dialeto de Curuc en partes de Nepal e Butan. Nomes jeografial longo la costas de la Mar Arabi, e influes gramatical dravidian como cluinte en la linguas indoarian, sujeste ce la linguas dravidian ia es parlada plu vasta tra la sucontinente indian.

La sivilia de la Rio Indo (3300 - 1900 aec), locada en la norde-este de la sucontinente indian, es comun suposada como es dravidian. Similias cultural e linguistica ia es sitada como evidentes forte de un protodravidian orijin de la cultur. La descovre en Tamil Nadu de un sisel de petra suposada marcada con sinias de la sivilia de la Rio Indo de la neolitica tarde (la milenio du aec temprana, pd pos la descrese de la harapanes) ia es videda par alga como un indica de un orijin dravidian.

La linguas dravidian es aglutinante, e usa sempre sufisas, nunca prefisas. La ordina de parolas normal es sujeto-ojeto-verbo, ma la ordina es relativa libre. Lingua dravidian ave pronomes "cluinte", pd la pronomes de person un plural inclui de formas - incluinte e escluinte. Tempo per verbos ia es orijinal sola pasada-nonpasada. Los pote es transitiva, nontransitiva, e causativa, con voses ativa e pasiva. Cada verbo ave ance un forma negativa. La linguas ave multe similias gramatical con a linguas uralica, ma los ave no corelata en sua vocabulos per indica un relata vera.

La fonolojia es relativa simple. Lo ave sinco vocales - a, e, i, o, u - con varias corta e longa; lo no ave diftongos, ma usa y e v (o w) pos a. Consonantes inclui esplodentes con contrastes labial/dental, alveolal/retroflexe, e palatal/velal, ma no inclui formas vosida. Nasales ave formas labial, dental, retroflexe, e palatal. r e l ave formas alveolal e retroflexe. Final la consonantes inclui w/v e y. La plu de la linguas dravidian no usa esplodentes aspirada, ma reconose, a min en scrive, la distingui en parolas emprestada de sanscrito e otra linguas indoeuropean.