Telugu (lingua)
Telugu es un de la linguas dravidian parlada en la statos barat Andhra Pradesh, Telangana, e la teritorios de la unia de Puducherry (o Yanam) par la popla telugu, e es un de la 22 linguas ofisial de Barat. On ave ance multe minorias en la statos visina. Lo es la lingua cuatro en la cuantia de parlores nativa en Barat, con sirca sete persento en la conta de abitores, e lingua 15 en la lista de la linguas la plu parlada en la mundo (Ethnologue).
Seguente la linguiste Bhadriraju Krishnamurti, telugu ia desende de protodravidian, cual ia es parlada sirca la milenia tre aec, posible en la rejion sirca la basin de la Rio Godavari basa. Seguente la linguiste rusce Mihail S. Andronov, telugu ia fende de protodravidian entre 1500 e 1000 aec.
Fonetica[edita | edita la fonte]
Parolas en telugu fini plu comun en vocales. En telugu vea, es ia es asoluta; en la lingua moderne, m, n, y, e w pote fini la parola. No tipal per un lingua dravidian, consonantes vosida ia es distinguida an en la forma la plu vea. Parolas emprestada de Sanscrito ia introdui consonantes aspirada e murmurada ance.
Telugu no ave asentua contrastante, e parlores varia a cual los persepi un asentua. La plu pone lo sur la silaba ante la silaba final, o a la silaba final, dependente de la parola e longia de la vocal.
Telugu ave un forma de armonia de vocales, como linguas uralica e linguas turcica, per esemplo, en cual la vocal du en la radises de nomes e ajetivos con du silabas: si la vocal prima es tensa o lax, la vocal du es tal ance. E si la vocal du es abrida (a o a longa), la vocal prima es plu abrida e sentralida. Parolas ave ance vocales en sufisas de infleta cual es armonida con la vocales de la silaba presedente.
| Vocales – అచ్చులు achlu | |||||
|---|---|---|---|---|---|
| i ఇ i | iː ఈ ī | u ఉ u | uː ఊ ū | ||
| e ఎ e | eː ఏ ē | o ఒ o | oː ఓ ō | ||
| æː | a అ a | aː ఆ ā* | |||
- */æː/ aveni sola en parolas emprestada.
Telugu ave du diftongos: /ai/ ఐ ai e /au/ ఔ au.
| Labial | Dental | Retroflexe | Palatal | Velal | ||
|---|---|---|---|---|---|---|
| Plosiva | nonvosida | p | t | ʈ | t͡ʃ | k |
| vosida | b | d | ɖ | d͡ʒ | ɡ | |
| aspirada* | pʰ | tʰ | ʈʰ | t͡ʃʰ | kʰ | |
| murmurada* | bʱ | dʱ | ɖʱ | d͡ʒʱ | ɡʱ | |
| Nasal | m | n | ɳ | |||
| Fricante* | f | s | ʂ | ɕ | x | |
| Prosiminte | ʋ | l | ɭ | j | ||
| Tocante | r | |||||
- * La consonantes aspirada e murmurada aveni xef en parolas emprestada, e ance la fricantes estra la s.
Gramatica[edita | edita la fonte]
Telugu ave un ordina de parolas sujeto-verbo-ojeto (SOV).
Nomes es infletada per cuantia (singular e plural), seso (mas, fema, e neutra), e caso (nominativa, acusativa, jenetiva, dativa, vocativa, strumental, e locativa). La sufisas es multe coerente.
Per verbos, telugu ave du conjugas nativa, e un plu per parolas emprestada. Los es multe coerente: Si on recorda la prima forma, on pote recorda tota otras.
Verbos es infletada per person, tempo, modo, e aspeta. La persones inclui singular e plural de person un, du, e tre. La tempos inclui presente, pasada, futur, e aoriste (comun la mesma como presente). Telugu ance distingui entre verbos indicante, ipotesal, e comandante, ma usa aidantes per indica ativa e pasiva
La verbos ave la infinitiva (cual pote aseta finis nomal, e alora funsiona como verbos nomin), e partisipios presente, pasada, e aoriste. On ave ance un forma negativa en aoriste e en la comandante.
Scrive[edita | edita la fonte]
La scrive per telugu es un abugida composada de 60 simboles - 16 vocales, tre alterantes per vocales, e 41 consonantes. La scrive es derivada de la scrive brahmi, como multe otra linguas de Barat. Lo es scriveda de sinistra a destra e es composada de segues de simboles simple e/o complicada. Vide la alfabeta telugu per plu.