Preistoria de la americanes norde orijinal
Esta article es sur la preistoria de la americanes norde orijinal en la area de Canada e la SUA. La periodo estende de la migras a la area en la paleolitica e la coloni par europeanes en la sentenio 16.
La migras orijinal[edita | edita la fonte]
Seguente la teoria la plu asetada de la coloni orijinal de la Americas, migras de umanas de Eurasia a la Americas ia aveni par Beringia, un ponte de tera cual lia la du continentes ultra cual es aora la Streta Bering. La cuantia e composa de la migras es ancora debateda. La niveles cadente de la mar asosiada con un periodo de glasia ia crea la ponte liante Sibir e Alaska sirca 60,000 a 25,000 anios a ante. La migra la plu resente pote ia aveni sirca 12,000 anios a ante, ma la plu temprana resta nonserta.
En loca de nomes como la neolitica, etc, cual refere vera a la mundo vea, asi, nos usa la clases de periodos arceolojial de la libro Method and Theory in American Archaeology ("metodo e teoria en arceolojia american") par Gordon Willey e Philip Phillip, 1958, ci ia divide la preistoria entre sinco fases.
La periodo litica[edita | edita la fonte]
Multe cultures ia ocupa America Norde, con alga sperdeda tra la Planos Grande e Lagos Grande, e areas en la ueste e sude-ueste. Seguente la istorias bocal de multe de la popla orijinal, los ia abita esta continente de sua jenese, descriveda par sua naras de crea tradisional. Otra tribus ave naras cual reporta migras tra estendes grande de tera e un rio grande, posible la Rio Mississipppi. Datos jenetica e linguistica lia la popla orijinal de esta continente con la asianes de Asia norde-este antica, e ia aida espertas per descovre alga de la migra en la Americas.
La cultur Clovis, cual inclui la xasa de mamales grande, es identifiada xef par la usa de un punto ranurida de lansas. Cosas de esta cultur ia es prima escavada en 1932 prosima a Clovis, Mexico Nova. La cultur Clovis estende tra multe de America Norde e ia es ance trovada en America Sude. La punto Clovis es fabricada de petra de foco con un indentes ranurida, par cual lo es insertada en la ase de la lansa. Los ia es arceolojial asosiada con osos de animales. Reesaminas de materiales plu resente, usante metodos de dati radiocarbonal ia produi resultes de anios radiocarbonal de 11,050 e 10,800 (sirca 9100 a 8850 aec).
La cultur Folsom ia es marcada par la usa de puntos Folsom como puntos de misiles e la ativias asosiada de locas de xasa, do la mata de la bisones aveni. La utiles ia es de 9000 e 8000 aec.
La popla na-dene ia entra America Norde comensante sirca 8000 aec, ateninte la costa norde-ueste de la Pasifica per 5000 aec, e de ala, los migra longo la costa e estende se en la interna. Eruditas crede ce sua asendentes composa un migra separada en America Norde, plu tarda ca la migrantes orijinal. Esta popla ia es la asendentes de los ci parla la linguas na-dene oji, incluinte la navaho e apatxe. Los ia construi casas grande multifamilial en sua vilas, cual ia es usada saisonal.
La periodo antica[edita | edita la fonte]
De la desenio de 1990, arceolojistes ia esplora 11 locas de la periodo antica media en Louisiana e Florida presente. La cultures temprana ia construi complesos con montones multiple. Los ia es sosias de xasores-coliores, e no la cultivores cual la arceolojistes ia crede como nesesada per susta vilas tan grande tra periodos longa. La esemplo xef es Watson Brake, Louisiana norde, de ci sua complesos de 11 montones es datida a 3500 aec, la loca la plu vea en America Norde de tal construi complicada. Lo es cuasi 2000 anios plu vea ca la loca de Poverty Point, Louisiana. Construi de la montones ia continua per 500 anios, asta cuando la loca ia es abandonada sirca 2800 aec, probable como la resulte de cambias de la ambiente.
La cultur de Poverty Point es un cultur de la periodo antica tarda cual ia abita la area de la vale de la Rio Mississippi e la costa la la Golfo Mexico. La cultur flori de 2200 aec a 700 aec. Evidentes de esta cultur ia es trovada a plu ca 100 locas, de la compleso major (un Loca de Erita Mundal UNESCO), tra un estende de 160 km a la loca Jaketown, Mississippi.
La popla de la cultur Oxara ia vive de 700 a 1000 ce. Los ia es parte de la cultur antica de la sude-ueste, sentrida en Mexico Nova norde-sentral, la Basin de San Juan, la vale de la Rio Grande, Colorado sude, e Utah sude-este.
La periodo posantica[edita | edita la fonte]
La periodos "forminte", "clasica", e "posclasica" es a vese combinada como la periodo posantica, cual estende de 1000 aec a pos. La cultures inclui la Woodland, Hopewell, e Mississippian.
La periodo Woodland ("bosces") de cultures de America Norde ante european refere a la periodo de sirca 1000 aec a 1000 ce en la parte este de America Norde. La rejion covre lo cual es Canada sude-este sude de la rejion suartica, la SUA este, e longo la Golfo Mexico.
La cultur Adena, un cultur notada per sua montones, ia esiste de 1000 aec a 200 aec, la periodo Woodland temprana. Lo ia es probable un cuantia de sosias relatada cual ia comparti un sistem de entera e rituos. La cultur ia es locada en la vale de la Rio Ohio, con sirca 200 vilas en Ohio, e un otra 200 en la statos visina, con posible miles plu no descovreda ancora. La cultur es la presedente a la tradisiones Hopewell.
La tradisiones Hopewell descrive la aspetas comun de la cultur cual flori longo la rios en la SUA norde-este e norde-sentral de 100 aec a 500 ec, en la periodo Woodland media. La tradision no es un cultur o sosia singular, ma un grupo vasta sperdeda de poplas relatada. Los ia es liada par un rede comun de vias de comersia. Esta periodo es videda como un paso de developa sin cambias masosa en un periodo corte, ma en loca, con un developa continuante de utiles de petra e oso, fabrica de cuoro, produi de texedas, tecnicas de cultiva e construi de casas, etc.
La popla orijinal de la costa norde-ueste de la Pasifica ia es divideda entre multe nasiones e tribus, cada con sua identias cultural e political. Ma los comparti alga credes, tradisiones, e praticas, como la importa de salmon como un recurso e simbol spirital. Sua festas de donada - la potlatx - es un aveni multe complicada en cual la tribu asembla per selebra avenis spesial. Esta avenis inclui la erije de un palo de totemes o la eleje o asinia de un xef nova. La obras de arte la plu famosa de la cultur es la palos de totemes, con siselidas de animales e otra carateres per onora credes cultural, lejendas, e avenis notable.
La cultur mississippian ia es un sivilia de americanes orijinal cual construi montones, datida de sirca 800 ce a 1600 ce, con varias par rejion. Lo es composada de un serie de vilas urban e viletas satelitin ("suburbes") liada par un rede de intercambia laxe. La site la plu grande ia es Cahokia (en Illinois de oji]], cual es posible un sentro major de relijio. La sivilia ia flori en la SUA norde-sentral, este, e sude-este.
Multe sosias ante-european ia es sedente, como la popla pueblo, mandan, hidatsa, etc, e alga ia fundi vilas grande, an sites, como Cahokia. En la norde-este de la SUA e la sude-este de Canada, la Irocuoi - ia ave un sosia avansada political e democrata, cual algas sujesta ia es un model partal per la governa nova de la SUA temprana.