Nordwestblock

De Vicipedia
Jump to navigation Jump to search
Cultures arceolojial de la eda de bronze asosiada con la Nordwestblock

La Nordwestblock ("bloco norde-ueste") es un rejion cultural ipotesal de Europa norde-ueste cual alga eruditas ia proposa como un cultur preistorial en la area presente de Nederland, Beljia, Frans norde, e Deutxland norde-ueste, un area bordada par la rios Somme, Oise, Meuse, e Elbe, e posible estendente a la parte este de cual es aora England, en la edas de bronze e fero de la milenios 3 a 1 aec, asta la comensa de arcivos istorial en la sentenio prima aec.

La teoria ia es prima proposada par du autores ci ia labora autonom: Hans Kuhn e Maurits Gysseling, de ci sua proposa ia inclui rexerca cual ia indica ce un otra lingua ia esiste posible a alga loca entre la linguas germanica e celta en la rejion de Beljia. La terma "Nordwestblock" ia es introduida par Hans Kuhn, ci ia vide la abitantes de un area no germanica e no celta, e donce ia atribui lo a la popla un etnico o cultur distinguida asta la eda de fero.

Kuhn ia nota ce, car /b/ en protoindoeuropean ia es multe rara. En la linguas germanica, la p es derivada de la /b/ de protoindoeuropean (estra alga combinas como /sp-/). En la linguas celta, la /p/ de protoindoeuropean ia desapare (estra alga esetas), e sola reapare en la linguas p-celta ia crea parolas cual comensa con p par cambia la protocelta kw a p. Estas resulta en un suporta per la ipotese ce la p en linguas germanica es plu probable un influe de la lingua de la popla de la Nordwestblock, cual algas ia nomi belgian.

La usa de la nom belgian per la lingua es suportada par la De Bello Gallico de Julio Cesar. El ia nota ce la popla de Belge e la Galia ia parla linguas diferente. Lo es plu suportada par toponimes en Beljia de oji, cual sujesta la esiste de un lingua indoeuropean distinguida de la linguas celta e germanica.

Suportores de la ipoteses de un lingua belgian sujesta ance ce lo ia es influeda par linguas germanica de un influe germanica temprana en la sentenio 3 aec (distinguida de la coloni par la francos en la sentenios 5-8 ec). Per esemplo, la cambias de sonas germanica (p → f, t → th, k → h, ŏ → ă) ia afeta toponimes cual ia es suposada como orijinal belgian.

Linguiste Peter Schrijver ia sujesta ce alga cualias de la lingua de la rejion pote ia influe la developa istorial de la linguas romanica e germanica de la rejion. El ia suposa ce la preesiste de linguas preindoeuropean liada a la cultur de vasos de bandas e a un familia de linguas marcada par verbos complicada, de cual la linguas caucasian norde-ueste es posible la sola survivores. An si lo es suposada ce trasas de estas resta en tota otra linguas indoeuropean, sua influe ta es spesial forte sur linguas celta cual orijina norde de la Alpes e en la rejion de la Nordwestblock.

Cualias de belgian inclui la reteni de p pos la cambias jeneral de sonas, un cualia compartida con la lingua lusitanian. Nomes de corpos de acua cual fini en -ara, como la nom per la Rio Dender; -ana o -ona, como en Matrona (la Rio Marne e la vileta Mater) e nomes de colonias cual fini en -iom, ia es suposada como tipal belgian ance.

Seguente Gysseling, indicas de belgian es ancora vidable. La sufisa diminuinte -ika, la sufisas fem -agjon e -astrjo, e la sufisa coliente -itja, ia es incluida en nederlandes, a veses multe produosa. En toponomia, apa, poel, broek, gaver, drecht, laar, e ham es retenida como indicas de belgian.

La problem resta ancora nonresolveda e no indicas serta ia es introduida per suporta cualce alternativa. J. P. Mallory ia vide la problem como un remente ce alga grupos de linguas cual no conveni clasi moderna pote ia survive asta la comensa de arcivos istorial.

Suporta arceolojial per la ipotese refere a un eda tan temprana como 3000 aec. La cultur de vasos campanin (2700-2100 aec) es suposada como orijina de la mesma area, en cuando la periodos temprana de acel cultur ia deriva de elementos de la cultur de vasos de bandas. La cultur de vasos campanin ia developa local a la cultur de vasos de filo spinosa (2100-1800 aec). En la milenio 2 aec, la rejion ia es a la borda entre la orizones atlantica e nordica, fendeda en un rejion norde e un sude, divideda rua par la Reno. A la norde, la cultur Elp (1800-800 aec) ia emerji, con un fase comensante de tumulos mostrante un relata a la otra grupos con tumulos a la norde, e un cambias seguente a la cultur Urnfeld (1200-800 aec). La rejion a sude ia deveni dominada par la cultur Hilversum (1800-800 aec), cual eritada la lias cultural de la cultur de vasos de filo spinosa con Britan.

Pos 800 aec, la area ia es influeda par la cultur Hallstatt de la celtas. La credes corente en Nederland es ce la eda de fero cual ia segue no ia inclui plu efetos celta, ma ia mostra un developa local de sua cultur de la eda bronze.

En la sentenios final aec, areas abitada a ante par la cultur Elp ia emerji como la cultur de Harpstedt cual ia es probable germanica, ueste de la cultur Jastorf germanica, e la partes a sude ia deveni asorbeda par la cultur La Tene de la celtas, cual comparti con la reporta de la Reno como un borda entre tribus celta e germanica par Julio Cesar.

Plu tarda, la retira roman ia resulta en la desapare de produidas importada como seramica e monetas, e un reveni a la metodos de produi local e cuasi noncambiada. A la norde, la popla ia continua abita la mesma casas de cultiverias de tre sesiones, e a la esta, tipos nova de construidas ia comensa. Plu sude, en Beljia, arceolojia mostra migras de la norde. Ultima, la cultur e linguas de la Nordwestblock ia es asorbeda par la migras germanica, spesial la federa de la francos.