Montserat

De Vicipedia
Montserrat
Imno: God Save the Queen

Montserat es un pais en la Mar Caribe, en la Isolas Leeward, cual es un parte de la cadena nomida la Antiles Minor, en la Indias Ueste Brites. Lo es un teritorio ultramar brites. Montserat ave un longia de sirca 16 cilometres e un largia de 11 cilometres, con sirca 40 cilometres de costa. Sua nometa es la Isola Smeralda de la Caribe par causa de sua similia a Er costal e la asende eres de multe de sua abitores.

A 18 julio 1995, en la parte sude de la isola, la volcan Soufrière Hills, cual ia dormi a ante, ia deveni ativa. Erutas ia destrui la site capital Plymouth de la eda de Re George. Entre 1995 e 2000, du tris de la popla de la isola ia es obligada a fuji, xef a la Rena Unida, lasante min ca 1200 persones sur la isola en 1997. (La cuantia ia crese a cuasi 5000 ante la fini de 2016.) La ativia volcanal continua, xef afetante la visinia de Plymouth, incluinte sua docas, e la lado este de la isola sirca la Airoporto W. H. Bramble, de cual sua restas ia es sumerjida su flues de ativia volcanal a 11 febrero 2010.

Un zona de esclui, estendente de la costa sude de la isola en dirije norde asta partes de la Vale Belham, ia es creada par causa de la grandia de la cupola volcanal esistente e la posiblia resultante de ativia piroclastica. Visitores es jeneral no permeteda a entra a la zona de esclui, ma on pote vide un vista impresante de la destrui de Plymouth de la apico de Colina Garibaldi en Baia Isles.

Relativa calma de la temprana de 2010, la volcan continua es intensa monitorida par la Oserveria Volcanal de Montserat. Lo es la volcan la plu studiada de mundo, e on ia descrive Montserat como "un Pompeii de eda moderna" en la Caribe.

On developa un vila e porto nova a Baia Little, cual es a la costa norde-ueste de la isola. En cuando esta construi aveni, la sentro de governa e comersia es a Brades.

La area es sirca 102 cilometres cuadrida. La lingua major es engles.


Antilies model
Paises autonom Aiti | Antigua e Barbuda | Bahamas | Barbados | Cuba | Dominica | Grenada | Guadelupe | Jamaica | Martinic | Porto Rica | Republica Dominican | San Kitts e Nevis | San Lusia | Trinidad e Tobago
Dependes Anguila | Antiles Nederlandes | Aruba | Bermuda | Isola Navasa | Isolas Caiman | Isolas Virjin | Montserat | Turcs e Caicos