Model:Bon article/18

Ros es un color entre roja e blanca, como un roja pal. Como la flor rosa, la nom de la color ros es ultima derivada de latina "rosa" (cual refere a la flor). Longo sondas en Europa e la SUA, ros es la color la plu comun asosiada con encanta, cortesia, sensosia, molia, dulsia, enfantia, feminia e relatas romantica. Cuando lo es combinada con blanca, lo es asosiada con nonculpablia. Cuando lo es combinada con violeta o negra, lo es asosiada con erotica e sedui.

Istoria, arte e moda

Entre preistoria e istoria posclasica

La color ros ia es descriveda en leteratur de pos la eda antica. En la Odisea, cual ia es scriveda sirca 800 aec, Homero ia scrive "Alora, cuando la enfante de matina, la matini de ditos rosin, ia apare…" Poesistes roman ia descrive ance la color. Roseus es la parola latina cual sinifia "rosin" o "ros". Lucretio ia usa la parola per descrive la matini en sua poesia epica De reurum natura (De la natur de cosas).

Ros no ia es un color comun en la moda de la eda medieval; nobiles ia prefere comun rojas plu briliante, per esemplo carmesi. An tal, lo ia apare en la moda de femes e en arte relijial. En la sentenios 13 e 14, en obras par Cimabue e Duccio di Buoninsegna, la enfante Cristo ia es vestida a alga veses en ros, la color cual ia es asosiada con la corpo de Cristo.

En Madona de la Diantos par Rafaello Sanzio, un depinta de la Renase, la enfante Cristo dona un flor ros a la Virjin Maria. La dianto ia es un simbol de sposia, e mostra un uni spirital entre la madre e la enfante.

Per plu, vade a Ros!