Compara de esperanto, ido, novial, interlingua, e elefen
Esperanto ia es presentada en 1887 par L. L. Zamenhof. Ido ia es presentada en 1907 par un comite gidada par Louis Couturat e Louis de Beaufront, como un atenta a boni esperanto. Novial ia es presentada en 1928 par la linguiste dansce, Otto Jespersen. Interlingua ia es presentada en 1951 par un ecipo de rexerca gidada par Alexander Gode. Elefen ia es presentada en 1998 par C. George Boeree e suportores. Tota sinco ia es desiniada spesial per servi como linguas aidante internasional.
Spele
Tota sinco linguas ave sistemes de spele multe coerente, an si interlingua permete alga varias cual es min lojical o coerente. Ido, novial, e elefen atenta evade combinas de sonas difisil, ma aseta ancora combinas como scr en "scrive". Esperanto difere de la otras par usa un grupo de leteras con un sinieta clamada un "ĉapelo" (xapo).
Elefen ave un alfabeta cirilica paralel.
Vocales es la mesma en tota sinco linguas:
| AFI | tota |
|---|---|
| [i] | i |
| [e] | e |
| [a] | a |
| [o] | o |
| [u] | u |
Diftongos es la mesma en tota, esetante en esperanto:
| AFI | Esperanto | Otras |
|---|---|---|
| [ai] | aj | ai |
| [au] | aŭ | au |
| [eu] | eŭ | eu |
| [oi] | oj | oi |
La plu de consonantes es ance la mesma, ma multe es diferente. Aceles mostrada en brasetas no es normal usada en acel lingua.
| AFI | Esperanto | Ido | Novial | Interlingua | Elefen |
|---|---|---|---|---|---|
| [p] | p | p | p | p | p |
| [b] | b | b | b | b | b |
| [t] | t | t | t | t, th | t |
| [d] | d | d | d | d | d |
| [k] | k | k | k, q | c, ch, q, k | c |
| [g] | g | g | g | g | g |
| [ts] | c | c | c | c | (ts) |
| [tʃ] | ĉ | ch | ch | (ch) | (tx) |
| [dʒ] | ĝ | j | j | (j, g) | (dj) |
| [ks] | ks | x | x | x | (cs) |
| [f] | f | f | f | f, ph | f |
| [v] | v | v | v | v | v |
| [s] | s | s | s | s | s |
| [z] | z | z | z | z, s | z |
| [ʃ] | š | sh | sh | (ch) | x |
| [ʒ] | ĵ | (j) | j | j (g) | j |
| [h] | h | h | h | (h)1 | h |
| [x] | ĥ | - | - | - | (h) |
| [m] | m | m | m | m | m |
| [n], [ŋ]2 | n | n | n | n | n |
| [w] | ŭ | w | w | u (w) | u |
| [y] | j | y | y | i (y) | i |
| [l] | l | l | l | l | l |
| [r] | r | r | r | r, rh | r |
Notas:
- 1. H es elejable silente en interlingua.
- 2. Tota pronunsia n ante [k] o [g] como [ŋ].
- 3. Interlingua permete consonantes duple.
Gramatica
Tota sinco ave gramaticas sinifiosa plu simple ce la plu de linguas natural. Esperanto, ido, e novial es lojical e coerente. An si ancora plu coerente ce la plu de linguas natural, interlingua permete alga formas noncoerente. La gramatica de elefen es coerente e plu simple ca la otras.
Esperanto e ido difere la roles de parolas par finis diferente per alga rol:
| Rol | Coda |
|---|---|
| nomes | -o |
| ajetivos | -a |
| averbos | -e |
| verbos | -s |
Novial usa xef la ordina de parolas. La fini -i es reservada per ajetivos, e -im per averbos derivada de ajetivos.
Interlingua e elefen usa la ordina de parolas en loca de finis, ma usa alga sufisas per cambia un rol a un otra. Per esemplo, interlingua usa -(e)mente per marca averbos derivada de ajetivos, e elefen usa -ia per crea nomes astrata de ajetivos e otra nomes.
Elefen no difere averbos de ajetivos e permete ce ambos ajetivos e verbos es usada como nomes sin cambia.
Esperanto usa la prefisa mal- per crea ajetivos con sinifias oposante (per esemplo, bona = bon, malbona = mal). La otra linguas normal usa parolas distinguida.
Esperanto ave un distingui entre nomes sujetal e ojetal, e marca ojetos con la sufisa -n. La plural es indicada con -j, e la ojeto plural con -jn. Plu, ajetivos acorda con sua nomes con la mesma marcas.
Ido cambia la -o de nomes a -i per indica la plural. Lo es posable marca ojetos con -n, ma esta truco no es multe usada. Lo ave no acorda entre nom e ajetivo.
Novial usa -s per indica la plural. Ojetos pote es indicada con -m (o -mes per plural) si nesesada. Novial ave du modos per indica posese: On pote usa de, o on pote usa -n (-sen per la plural). Lo no ave acorda entre nom e ajetivo.
Interlingua usa -s per marca la plural. Ojetos no es marcada spesial, eseta per pronomes, e no ave acorda entre nom e ajetivo.
Elefen usa ance -s per marca la plural. Lo no ave acorda entre nom e ajetivo, e no an pronomes es marcada como ojetos.
La ordina de parolas en tota linguas es fundal sujeto-verbo-ojeto. Esperanto permete multe varia car la finis per roles clari la relatas. Ido, novial, e interlingua es plu rijida. Elefen es la plu strinjente regardante la ordina de parolas.
Pronomes
Tota sinco linguas ave parolas spesifada per pronomes en tre persones en formas singular e plural. Esperanto, ido, novial, e interlingua ave pronomes separada per la person tre singular per mas, fema, e neutra. Ido, novial, e interlingua ave ance esta distinguis per la person tre plural. Ido e novial ave ance un pronom diferente per la person tre comun. A la otra lado, elefen ave sola un pronom per tota sesos en la singular, e sola un en la plural. Ma lo introdui un pronom spesial - lo - per cosas.
| Engles | Esperanto | Ido | Novial | Interlingua | Elefen | |
|---|---|---|---|---|---|---|
| 1 sing | I, me | mi, min | me | me | io, me | me |
| 2 sing | you | vi, vin | tu | vu | tu, te | tu |
| 3 sing (mas) | he, him | li, lin | il | lo | ille, le | el |
| 3 sing (fema | she, her | ŝi, ŝin | el | la | illa, la | |
| 3 sing (comun) | he, him | ĝi, ĝin | lu | le | ille, le | |
| 3 sing (cosa) | it | ol | lu | illo, lo | lo | |
| 3 sing (refletante) | himself, etc. | sin | su | se | se | se |
| 3 sing (nondefinada) | one, you, they | oni | on | on | on, uno | on |
| 1 plural | we, us | ni, nin | ni | nus | nos | nos |
| 2 plural | you | vi, vin | vi | vus | vos | vos |
| 3 plural (mas) | they | ili, ilin | ili | los | illes, les | los |
| 3 plural (fema) | eli | las | illas,las | |||
| 3 plural (cosa) | oli | lus | illos, los | |||
| 3 plural (comun) | li | les | illes, les |
Do on ave duples de pronomes a supra, la prima es la forma sujetal, e numero du es la forma ojetal (de cual la usa varia per cada lingua).
Per crea ajetivos de posese, esperanto ajunta -a a la pronom, cual aseta ance -j e -n per acorda con sua nom. Ido usa ance -a, ma la ajetivo no varia. Novial usa de o -n. Elefen ajunta -a a la pronom, esetante sua per person tre, singular e plural. Interlingua usa un serie de formas noncoerente.
| Engles | Esperanto | Ido | Novial | Interlingua | Elefen | |
|---|---|---|---|---|---|---|
| 1 sing | my | mia | mea | men | mi | mea |
| 2 sing | your | via | tua | vun | tu | tua |
| 3 sing mas | his | lia | ila | lon | su | sua |
| 3 sing fem | her | ŝia | ela | lan | ||
| 3 sing cosa | its | ĝia | lua | len | ||
| 3 sing comun | his | ola | olu | lun | ||
| 1 plural | our | nia | nia | nusen | nostre | nosa |
| 2 plural | your | via | via | vusen | vostre | vosa |
| 3 plural | their | ilia | ilia, elia, olia, lia | losen | lor | sua |
Verbos
En tota la linguas, verbos no varia per person o numero. En esperanto e ido, partisipios pote es usada en modos pasada, presente, e futur, como indicada a su par "(i/a/o)". En elefen, tempo es indicada con particulas ce presede la verbo en loca de sufisas. Novial usa particulas, ma permete ance la usa de -d per la pasada.
| Engles | Esperanto | Ido | Novial | Interlingua | Elefen | |
|---|---|---|---|---|---|---|
| pasada | -ed | -is | -is | did, -d | -va | ia |
| presente | - | -as | -as | - | - | - |
| futur | will | -os | -os | sal | -ra | va |
| comanda | - | -u | -ez | - | - | - |
| ipotesal | - | -us | -us | vud | -rea | ta |
| infinitivo | to | -i | -r | - | -r | - |
| partisipio ativa | -ing | (i/a/o)-nta | (i/a/o)-nta | -nt | -(e)nte | -nte |
| partisipio pasiva | -ed | (i/a/o)-ta | (i/a/o)-ta | -t | -te | -da |
En interlingua, ave varias noncoerente per haber e esser. Ance sentos de verbos ave du radises, fundida a sua radises latina. Per esempo, ager (ata) ave un forma alternativa act- usada per crea nomes e ajetivos. Simil, sentir ave sens-, repeller ave repuls-, etc. La otra linguas eleje un de la radises o un otra.
Vocabulo
Tota sinco linguas es "euroclones", un nom alga negativa cual sujesta ce los es desiniada per atrae sola persones ci parla linguas european (spesial la linguas romanica e germanica). Ma on debe nota ce prende parolas de linguas de sirca la globo, o crea parolas de nova, no fa vera ce un lingua desiniada es plu fasil per cualcun.
Ido prende la plu de sua vocabulo de esperanto, ma cambia multe parolas de fontes nonromanica a parolas comun entre la linguas romanica, e ajunta parolas separada per la oposas con mal- de esperanto.
Novial prende la plu de sua vocabulo de la linguas romanica, ma prende multe de engles e alga de deutx ance.
Interlingua prende la plu de sua vocabulo de la linguas romanica, ma prefere varias de radises trovada ance en engles, deutx, e rusce. Esta metodo condui a un prefere per formas latina de radises, plu comun trovada en engles e franses. Interlingua usa ance latina como un fonte per parolas cual no ave acorda clar entre la linguas moderna.
Elefen prende tota sua vocabulo de la linguas romanica moderna (espaniol, portuges, catalan, franses, e italian) con interesa minima a engles o latina.
Esperanto, ido, e novial usa sinifiante la afisas per crea parolas nova. Interlingua e elefen usa min e resta plu prosima a la linguas romanica per sua aspeta. Interlingua es alga noncoerente en sua usa de afisas, comparada con la otra linguas.
Engles
|
Esperanto
|
Ido
|
Novial
|
Interlingua
|
Elefen
|