Chaturanga

De Vicipedia
Jump to navigation Jump to search
Krishna e Radha, juante chaturanga

Chaturanga (sanscrito: चतुरङ्ग; caturaṅga; pronunsiada en elefen: txaturanga), es un jua de stratejia de India antica, suposada la asendente comun per la juas de table xace, shogi, e xiangqi, e otras. Chaturanga es prima videda en la Impero Guptan de India norde en sirca la sentenio 2 ec. En la sentenio 7, lo ia es adotada como 'shatranj en Persia de la Impero Sasanan, cual ia deveni la forma de xace introduida a Europa de la eda medieval tarda.

Chaturanga es un parola composada cual sinifia "con cuatro membros o partes", e en poesia epica, lo ave la sinifia "armada". Lo es posible ce la nom deriva de un ordina de batalia notada en la epica indian, la Mahabharata, referente a la cuatro divides de un armada, pd elefantores, carores, cavalores, e peones. Un ordina antica de batalia, akshauhini, sembla la ordina a la comensa de chaturanga. Un jua de table relatada nomida chaturaji, cual es desiniada per cuatro juores, ia es suposada la jua vera de chaturanga en alga testos european.

La regulas de chaturanga no es tota conoseda. Istoristes de xace suposa ce la jua ia ave regulas simil a los de shatranj. La jua ia es juada sur un table nomida la ashtapada. Lo ave 64 cuadros de 8 linias e 8 colones. Tradisional, la table no ave la cuadros indicada en la modo de xace moderna.

  • La raja (re) move como la re en xace - un cuadro en cualce dirije. On no pote intercambia la re e la ratha (tore), como permeteda en xace moderna.
  • La mantri (ministro o conselor), ance conoseda como la senapati (jeneral), move un cuadro diagonal, como la fers de shatranj. Lo ia evolui a la rea en xace moderna.
  • La ratha (caro), ance conoseda como la sakata) move como la tore en xace, pd ortogonal tra cualce cuantia de cuadros nonocupada.
  • La gaja (elefante), ance conoseda como la hastin) move probable du cuadros diagonal, saltante supra la cuadro prima, como la alfil en shatranj. Un otra posible es ce lo move du cuadros ortogonal, saltante supra la cuadro prima, como la dabbabah (un macina per aseta, o, en arabi moderna, un tance) en varias "fe" de xace.
  • La ashva (cavalo), cual move como un cavalor en xace.
  • La padati o bhata (infantria), ance conoseda como la sainik (geror), move e catura como la peon en xace moderna, pd un cuadro a ante ortagonal per move, un cuadro a ante diagonal per catura, ma sin la eleje de du cuadro en la move prima.

La pesos es ordinada en la linia prima caro - cavalo - elefante - re - conselor - elefante - cavalo - caro, con oto peones en la linia du. La gol es la mesma como en xace: La catura de la re de la enemi, pd la xacemata.