Impero Sasanan

De Vicipedia
Jump to navigation Jump to search
La Impero Sasanan a sua estende la plu grande; la area en bandas ia es su sua controla en la gera con la Impero Bizantian, 602-628 ec.
La testa de un re, sentenio 4.
La castel Falak-ol-Aflak en Khorramabad.

La Impero Sasanan ia es la impero persian cual ia segue la Impero Partian. La Impero Sasanan ia es fundida par Ardashir 1, pos la cade de la Impero Partian e la defeta de la re Arsacid final, Artabanus 5. La impero ia es reconoseda como un de la du potias xef de Asia ueste e Europa, con la Impero Roman e sua seguente, la Impero Bizantian, per un periodo de 400 anios. Lo ia es concistada par la muslimes 651 ec.

La Impero Sasanan es videda como un de edas istorial la plu importante de Iran. En multe modos, la periodo sasanan ia mostra la culmina de sivilia irani antica. Sua influe cultural ia estende ultra sua bordas, an ateni Europa ueste, Africa, Xina, e India. Lo ia ance ave un rol sinifiante en la arte medieval european e asian. Multe de lo cual ia deveni conoseda como la cultur muslim en arte, arciteta, musica, e otra cosas, ia es transfereda de la sasananes tra la mundo muslim.

La area ia es per la plu parte zoroastriste, ma la paganisme e otra ideas relijiosa de Elas ia sperde e misca con zoroastrisme pos cuando Alexandro la grande ia concista la Impero Persian de Dario 3 - un prosede de sintese cual ia continua tra la eda de la partianes. Ma, su la sasananes, un zoroastrisme ortodox ia es reviveda e la relijio ta developa en multe modos importante. La foco santa ia ave un rol importante en la impero.

Zoroastrisme sasanan ta developa per ave distinguis clar de la praticas presentada en la Avesta, la libros santa de zoroastrisme. La politicas relijiosa de la sasananes ia contribui a la flori de multe promoves de reformi relijio, spesial en la relijios de Mani e Mazdak. Con alga esetas, la impero ia es multe libral regardante otra relijios, incluinte induisme, budisme, iudisme, e an cristianisme, estra en la periodo de la geras con la Impero Bizantian.

La sosia ia ave un sistem de cuatro castes o clases, simil a lo de induisme:

  • Asronan (pretes)
  • Arteshtaran (grerores)
  • Wastaryoshan (comunes)
  • Hutukhshan (artisanes)

A la sentro de la sistem, la xahanxah (xa de xas) ia rena sur tota nobiles. La prinses, otra renores, propriores grande, e pretes ia composa, con lunlotra, un strato vantajida, con la nom wuzurgan (la grandes). Un otra divide ia es entre la azatan (omes libre), ci ia es la desendentes de la concistores iranian antica, e la masa de campaniores noniranian. La azatan ia formi un aristocratia basa de dirijores, la plu abitante imobilas peti, e ci ia furni la cavalores de la armada sasanan. Esta sistem pare es alga rijida, e lo survive pos la cade de la impero, continuante en la periodo temprana muslim. Sclavia ia es relativa rara, e sclavos ia ave alga protejes e diretos.

Femes de la sosia sasanan ia es videda como modeles de roles, mostrante bon condui. Femes ia es espetada per aseta la rol de manaje la casa como fias, sposas, e madres, e no per atenta gania reconose publica. An si femes ia debe obedi omes, los ia ave alga diretos legal, incluinte la direto per entra acordas contratal, comersia, e asede a sua erita. Ma los es ance cargada con paia sua detas e debe segue la leges o sufri la conseguentes.