Chaturaji
Chaturaji (o txaturadji), cual sinifia "cuatro rajas", es un jua per cuatro juores en la modo de xace. Lo ia es prima descriveda sirca 1030 par Al-Biruni en sua libro India. Orijinal, esta ia es un jua de acaso: la pesos ia es moveda par la lansa de du dados. Un varia sin dados ia es ancora juada en India a la fini de la sentenio 19. Alga istoristes crede ce esta es la asendente de chaturanga, e donce la asendente de tota juas xacin.
La epica antica indian Mahabharata, ave un refere a un jua cual pote es chaturaji:
- Introduinte me como un Brahmana, nomida Kanka, esperta a dados e amor de jua, me va deveni un person de la corte de acel raja de spirito alta. E movente sur tables de xace la peones bela fabricada de ivor, de colores blu e jala e roja e blanca, par lansas de dados negra e roja, me va diverti la raja con sua atendores e amis.
Lo no es serta, an tal, ce la jua notada es vera como chaturaji, o un jua de corsa como patxisi.
A la comensa, la pesos es ordinada como esta:
| B | P | R | E | C | B | ||
| C | P | P | P | P | P | ||
| E | P | ||||||
| R | P | ||||||
| P | R | ||||||
| P | E | ||||||
| P | P | P | P | P | C | ||
| B | C | E | R | P | B |
- P = peon
- B = barcon
- C = cavalo
- E = elefante
- R = raja
La jua es juada con pesos de cuatro colores diferente. Cada juor ave cuatro pesos a sua linia la plu prosima con cuatro peones ante los a la linia du. La pesos es un raja, un elefante, un cavalo, e un barcon. La raja move como la re en xace, la elefante como la tore en xace, e la cavalo como la cavalero en xace. La barcon coresponde a la bispo en xace, ma con un estende de move multe restrinjeda: como la alfil en shatranj, lo move du cuadros diagonal en cualce dirije, saltante supra la cuadro a media. Strana, esta difere de la plu de juas xacin en cual la elefante normal coresponde a la bispo. (La dentones de la elefante ia es mutada a la xapo de la bispo.) Turnos pasa orolojial sirca la table.
La peon ance move como en xace, ma on no ave la eleje de un move comensante de du cuadros. Cada de la peones de la cuatro juores move e catura en un dirije diferente. Ance, la peones es levada par regulas diferente: lo es levada a la peso cual comensa a la mesma colon, ma sola si acel peso ia es caturada a ante. La peon de la raja es levada a un raja nova.
Un modo de catura noncomun es nomida la "vinse de la barcon": Cuando un barcon move a un cuadro cual completa un cuadro du par du con la otra tre barcones catura tota tre barcones.
A cada turno, du dados es lansada, tipal bastetas de cuadro lados. Juores ia es permeteda lansa la dados en la aira e catura los, cual permete cualce grado de controla. Cual pesos pote move es determinada par la valuas de la dados:
- 2 = barcon
- 3 = cavalo
- 4 = elefante
- 5 = peon o raja
Du pesos pote es moveda, o un peso du veses, seguente la valuas de la dados.
La jua no ave un "xace" o "xacemata". La raja pote es caturada como cualce otra peso. La gol de la jua es per colie tan multe puntos como posible. Puntos es ganiada par catura la pesos de oposante juores, seguente esta lista:
- peon = 1 punto
- barcon = 2 puntos
- cavalo = 3 puntos
- elefante = 4 puntos
- raja = 5 puntos
54 puntos es donada a la juor ci ia catura tota tre rajas, con sua propre raja ancora sur la table. Esta valua es la soma de puntas de tota pesos en tre armadas.