TriMet

De Vicipedia

TriMet, ofisial la Distrito de transporta urban tricontial de Oregon (Tri-County Metropolitan Transportation District of Oregon) es un corpora munisipal per intende spesial, constituida par la lege de la stato de Oregon, SUA, en la Codigo revisada de Oregon, capitol 267 . La Distrito ave la autoria de legi, imposta, e de polisia en la area de servi.  TriMet es encargada a construi e dirije un sistem de transporta publica en la area urban de la contias Clackamas, Multnomah, e Washington, en la stato de Oregon, incluinte la sites de Portland , Gresham, Fairview, Troutdale, Wood Village, Maywood Park, Lake Oswego , West Linn, Tualatin , Rivergrove , Tigard, Durham, King City, Beaverton, Hillsboro, Cornelius, Forest Grove, Oregon City, Gladstone, Milwaukie, Happy Valley, e Estacada, ma escluinte la sites de Canby, Damascus, Molalla, Sandy, e Wilsonville.

Istoria[edita | edita la fonte]

Ante TriMet[edita | edita la fonte]

En 1872, a 21 anios pos la corpora de la site de Portland, Ben Holladay ia compra alga caros tirada par cavalos e mulos, de San Fransisco.  El ia comensa un servi de caros sur la via 1 entre la stradas Glisan e Caruthers en la sentro de Portland.

En 1888, un sistem de tram de vapor ia es construida, raminte en dirijes a Monte Scott, Monte Tabor, bolevar Hawthorne, St Johns, e Vancouver, Washington.  En la anio seguente, trames eletrical ia es introduida, sustituinte per la trames de vapor.  En 1892, la Compania de ferovias sur strada combinada de Portland (Portland Consolidated Street Railway Company) ia es formida, e ia fusa tre companias cual ia ave alga linias de tram en la vila.

En 1893, un ferovia interurban eletrical de 16 milias, la Ferovia de la Lado Este (East Side Railway), ia comensa servi de Portland a Willamette Falls (en Oregon City).  En 1906, tota la linias de tram e la ferovias interurban ia es combinada, en junta con alga otra companias, e ia deveni la Compania ferovial e eletrical de Portland (Portland Railway, Light and Power Company).

En 1910, la sistem de interurban ia estende a Eugene en la sude, a Troutdale en la este, a McMinnville en la ueste, e Vancouver, Washington en la norde.   

Pos la Gera Mundal Du, la cuantia de usores de la Portland Rail ia diminui forte, par alga razonas, incluinte la popularia cresante de autos.  En 1950, la linias de tram ia es abolida.  En 1956, la compania nova, Rose City Transit, ia oteni tota funsionas de transporta publica de Portland Rail, cual ia es alora un parte de la Compania de enerjia eletrical de Portland (Portland Electric Power Company, PEPCO).  PEPCO es aora conoseda como la Portland General Electric (PGE).

TriMet[edita | edita la fonte]

En la desenio de 1960, la Rose City Transit ia deveni cuasi bancarota, par la cuantia diminuida de clientes, e la costas grandida de combustables e empleadas.  En 1969, Terry Schrunk, alora la maior de Portland, ia reuni un comite avisal sur transporta publica.  A 14 janero 1969, la consilio munisipal de Portland ia aproba un resolve per crea la Distrito de transporta urban tricontial de Oregon (Tri-Met, con un sinia de junta asta a 1 setembre 2002) e la Legeria de Oregon ia aproba la Proposa de la Camera de representores (HB) 1808, cual ia constitui ofisial la Tri-Met en marto 1969.

A medianote de 1 desembre 1969, la Rose City Transit ia pasa sua ativas e obligas a la Tri-Met, e la Tri-Met ia comensa sua servi.  Un contrae de labor ia es aprobada entre la Tri-Met e la Sindicato combinada de transporta (Amalgamated Transit Union), comite local 757.