Rio Mississippi

De Vicipedia
Un mapa de la Rio Mississippi
La barcon "Delta Queen", en Paducah, sur la Mississippi

La Rio Mississippi es la rio xef de la basin du en grandia a la continente America Norde, con sola la basin de la Baia Hudson plu grande. La rio es tota en la SUA, an si la basin estende en Canada. Sua fonte es Lago Itasca en Minnesota norde, e lo flue jeneral sude per 3730 km a la delta a la Golfo de Mexico. Con sua multe enflues, la basin de la Mississippi drena tota a partes de 31 de la statos de la SUA e du provinses de Canada entre la Montes Rocosa e la Montes Apalatxian.

La americanes orijinal ia abita longo la Rio Mississippi e sua enflues per milenias. La plu de los ia es xasores-coliores, ma algas, como la construores de colinetas, ia formi sosias de cultivores susedosa. La ariva de europeanes en la sentenio 16 ia cambia la modo de vive de la americanes orijinal prima como esplorores e plu tarde como colonistes, ia veni a la basin en cuantias cresente. Orijinal, la rio ia servi como un impedi cual ia formi bordas per Espania Nova, Frans Nova, e la Statos Unida temprana. Alora, lo servi como un arteria esensal per transporta e comunica. En la sentenio 19, en la culmina de la ideolojia de "destinia evidente", la Mississippi e alga enflues ueste, spesial la Rio Missouri, formida via per la estende de la Statos Unida a la ueste.

La areas formida de stratos spesa de la depones de la rio es un de la rejiones la plu fertil en la pais, cual ia resulta en la eda de barcones de vapor a la rio. En la Gera Interna American, la catura de la Mississippi par fortes de la norde ia marca la punto de reversa a vinse, la resulta de la importa de la rio como un via de comersa e viaja. Causada par la crese de sites e la grandia de la barcones e barcasas cual segue la barcones tradisional, la prima desenios de la sentenio 20 ia vide la construi de obras enorme de injenia como la paradeluvias, pararios, e clusos, comun construida en combina.

Pos la comensa de developa moderne de la basin, la Mississippi ia vide ance susa comparti de contamina e problemes ecolojial, spesial la volumes enorme de la supraflue cultival, cual ia condui a la zona mor de la Golfo Mexican estra la delta. En anios resente, la rio ia mostra un move continual a la canal de la Rio Atchafalaya en la delta. Un cambia de la curso ta es un desastre economial per la site e porto de Nova Orleans.