Ptolemeo

De Vicipedia
(Redirijeda de Ptolomeo)
Ptolemeo

Informa personal

Nase: s 100 ec en Egipte, Impero Roman
Mori: s 170 en Alexandria, Impero Roman
Pais: Impero Roman

Otra informas

Profesa: Matematiciste, astronomiste, jeografiste e astrolojiste

Claudio Ptolemeo (elinica: Κλαύδιος Πτολεμαῖος) (sirca 100 ec - sirca 170 ec) ia es un matematiciste, jeografiste, astronomiste, e astrolojiste elinica-roman de la sentenio du. El ia abita en la site de Alexandria en la provinse roman de Egipte, ia es un sitadan roman, ma ia scrive en elinica comun.

Ptolemeo ia scrive teses siensal, de cual tre ia importa a la siensa bizantian, muslim, e european plu tarde. La prima ia es un tese matematica aora conoseda como la Almagest (orijinal "La tese matematica", plu tarde "La tese grande"). La tese du es la Jeografia, cual es un discute cuasi completa de la sabe jeografial de la mundo elenica-roman. La tese tre es un tese de astrolojia, en cual el ia atenta ajusta astrolojia oroscopial a la filosofia natural de Aristotele, nomida la Apotelesmatica (plu comun conoseda como la Tetrabiblos o Quadripartitum, elinica e latina per "cuatro libros").

Astronomia[edita | edita la fonte]

La sistem astronomial de Ptolemeo

La Almagest es la sola tese antica survivente sur astronomia. La astronomistes de Babilon ia developa tecnicas de aritmetica per calcula fenomenos astronomial, e astronomistes de Elas como Hiparco ia produi modeles jeometrial per calcula la moves de cosas astronomial. Ptolemeo ia declara ce el ia deriva sua modeles jeometrial de la oservas par sua presedores tra plu ca 800 anios, ma astronomistes ia suspeta ce sua parametres ia es adotada autonom de oservas.

Ptolemeo ia presenta sua modeles en tables pratical, cual pote es usada per calcula la locas pasada o futur de la planetas. La Almagest inclui ance un catalogo de stelas, cual es un varia de lo creada par Hiparco. Sua lista de 48 constelas es la asendente de la sistem moderne de constelas, ma no inclui la sielo intera - sola la parte cual Hiparco ia pote vide.

Tra Europa, Asia ueste, e Africa norde en la eda medieval, lo ia es la testo autoriosa sur astronomia, e sua autor ia deveni un person cuasi mital, comun nomida "Ptolemeo, Re de Alexandria". La Almagest ia es conservada, como la plu de testos antica de siensa elinica, en manoscritos arabi, de cual la nom es derivada. Par la reputa de la testo, lo ia es xercada tra la mundo european e ia es traduida du veses a latina en la sentenio 12, en Sisilia e Espania. La model de Ptolemeo, como los de sua presedores, ia es jeosentrica e asetada cuasi universal asta la ariva de modeles eliosentrica plu simple en la revolui siensal.

Sua ipotese de planetas ia vade ultra la model de la Almagest per presenta un reali fisical de la universo como un grupo de sferas consentral, en cual el ia usada la episiclos de sua model de planetas per calcula la grandia de la universa. El ia estima ce la sol ia es a un distantia de 1210 raios de tera, e la raio de la sfera de stelas fisada ia es 20,000 raios de tera.

Ptolemeo ia presenta un bon util per calculas astronomial en sua "tables usosa", cual tabli tota la data nesesada per calcula la locas de la sol, luna, e planetas, la leva e reposa de la stelas, e la eclises de la sol e luna, e furni la model per tables plu tarde. En la Phaseis ("Levas de la stelas fisada"), el ia dona un calendrio de stelas, fundida sur la apares e desapares de stelas tra la curso de un anio solal.

Jeografia[edita | edita la fonte]

Un copia de la mapa mundal de Ptolemeo, de la sentenio 15

La Jeografia ia es un colie de coordinas jeografial de la parte de la mundo conoseda par la sitadanes de la Impero Roman. El ia depende alga de la obras de un jeografiste plu temprana, Marinos de Sur, e de arcivistes de la Impero Roman e Impero Persian. El ia reconose ance la astronomiste antica Hiparco per ia furni la altia de la polo de sielo norde per alga sites.

La parte prima de Jeografia es un discute de la data e metodos usada. Ptolemeo, seguente la modeles en la Almagest, pone tota esta informa en un scema grande. Seguente Marinos, el ia asinia coordinas a tota locas cual el conoseda, en un matris cual estende tra la globo. Latitude ia es mesurada de la ecuator, como oji, ma Ptolemeo ia prefere refere a lo como la "clima", pd la longia de la dia la plu longa: la longia de la dia de estate media crese de 12 oras a 24 oras como on move de la ecuator a la sirculo polal. El loca la meridiano de 0 lonjitude a la "Isolas Fortunosa" en la Mar Atlantica (probable la Isolas Canario).

Ptolemeo ia desinia e furni instruis per crea mapas de la mundo intera e de la provinses roman. Sua mapa de la mundo estende 180 grados de lonjitude de la Isolas Canario a la media de Xina, e sirca 80 grados de latitude de Shetland a la costa este de Africa. Ptolemeo ia es consensa ce el conose sola sirca un cuarti de la globo, e la estende erante de Xina a sude sujeste ce sua fontes no ia estende la tota distantia a la Mar Pasifica.

Multe mapas ia es creada fundida sur la mapas par Ptolemeo. La mapas pare contorseda cuando comparada con mapas moderne, car sua datas no ia es coreta. Un razona es ce Ptolemeo ia estima la grandia de la tera como tro peti; Eratostene ia trova 700 stades (sirca 160 a 180 m) per un sirculo grande sur la globo, Ptolemeo usa 500 stades en la Jeografia. Car Ptolemeo ia deriva multe de sua latitudes importante de valuas cru de la dias la plu longa, sua latitudes era par sirca un grado, an si astronomistes antica ia sabe sua latitudes par un minuto.

Astrolojia[edita | edita la fonte]

Ptolemeo ia es regardada como un autoriosa grande de astrolojia, e sua tese sur lo ia es segueda per plu ca un mil anios. Lo ia es prima traduida a arabi, e alora en 1138 a latina en Espania par Plato de Tivoli. La Apotelesmatica es un tese estendeda sur la prinsipes antica de astrolojia oroscopial. Lo no ia deveni tan popular como sua otra obras car lo no inclui alga sujetos propular, como la astrolojia de elejes e astrolojia medical, e no ave la mesma cualias como un libro de instrui. La libro ia es plu un libro de tradisiones astrolojial.

La plu de contenis de la libro ia es derivada de fontes plu vea; Ptolemeo ia ordina la informa en un modo lojical e an razonal. En fato, el ia vide lo como la parte du per la parte prima, la Almagest, regardante la influes de planetas a la temperatur e umidia de la corpo umana, pd la personalia. El vide astrolojia como medica, pd un caso no esata, par causa de la multe elementos cual on nesesa considera: la raza, la pais, e la eleva de un person ta es tan importante como la locas de la sol, luna, e planetas a la momento de nase. El vide lo como un modo pratical e usosa per aida vive, e no como un siensa.

Musica[edita | edita la fonte]

Ptolemeo ia scrive ance un tese - Armonia - sur teoria musical. El sujeste fundi la intervales musical sur proportio matematical, suportada par oservas empirical. Plu temprana, Pitagora ia sujeste ce musica es fundida sur la proportio spesifada de 3:2; Ptolemeo ia crede ce la matematica de musica debe envolve tetracordas e otaves.

Otica[edita | edita la fonte]

La libro Otica survive sola en un tradui povre en arabi e en sirca 20 transcrives de arabi a latina. En lo, Ptolemeo ia scrive sur la cualias de lus, incluinte refleta, refrata, e color. Lo es un parte sinifia en la istoria temprana de optica e ia influe la libro plu famosa par Ibn al-Haytham. Otica conteni la table survivente la plu antica de refrata de aira a acua.

La libro es ance importante per la istoria temprana de persepi. El ia teoria ce la raios de la oio formi un cono, de cual la punto es en la oio e la basa defini la vista. La raios ia es sensosa e envia informa a la mente de la oservor sur la distantia e orienta de surfases. Ptolemeo ia ofre ance esplicas per multe fenomenos de ilumina e color, grandia, forma, move, e vide binoculal. El ia divide iludes entre los causada par fatores fisical o otical e los causada par fatores de judi.