Pitagora

De Vicipedia
Jump to navigation Jump to search
Pitagora
Pythagoras in the Roman Forum, Colosseum.jpg

Informa personal

Nase: 582 aec en Samos
Mori: 500 aec en Metaponto
Pais: Elas

Otra informas

Profesa: Filosofiste e matematiste

Pitagora (582–500 aec) ia es un filosofiste e matematiste elinica de Ionia. Pos viaja a multe paises, incluinte Galia (Frans moderna), Egipte e India, el ia abita a Crotona, un porto de Italia sude. Italia sude ia es la abitada la plu grande de elinicas estra Elas, e la romanes ia nomi lo "Magna Graecia" (Elas grande). Ala, el ia fundi un scola famosa.

Sua scola ia es plu simil a un comunia, e sua filosofia como un relijio. Car los ia crede a reincarne, tota de sua seguores ia es vejetalistes. Los ia evita vino, juras par dios, mal conduis sesal, e tro multe bones e joia. Per la prima sinco anios, un studiante nova ia fa un promete de povria. Femas ia es egal a la omes – un cosa vera rara en la mundo antica.

Sua filosofia ia es fundida en matematica, cual ia sinifia jeometria per la elinicas antica. Pitagora ia es onorada per alga demostras de jeometria, plu importante la teorem de Pitagora: La soma de la cuadros de la du lados de un triangulo reta es egal a la cuadro de la lado diagonal. El ia descovre la funda matematical de musica, e ia crede ce la moves de la planetas ("la musica de la sferas") ia ave la mesma funda. El ia vide ce un coere elejente pote es la funda de la universo intera.

En loca de xerca la regulas de natur en la move de materia e enerjia, el ia xerca los en la regulas formal de matematica. Car esta regulas esiste sola en la mente, Pitagora es regardada como un idealiste.

An si sua vive resta misteriosa, sua scola ia dura tra sirca 300 anios, e el ia ave un efeto profonda a tota ci ia segue, spesial Plato.