Mutaforma
En mitolojia, folclor, fantasia, e naras siensal, un mutaforma es un esente o vivente ci pote cambia sua forma fisical, tipal volente. Esta es comun fada par un capasia inerente de un esente mitolojial, par un ata divin, o la usa de majia. La idea es trovada en formas antica de totemisme e xamanisme, e en la leteratur e epicas poesial la plu antica, como la epica de Gilgamex e la Iliada, do la mutaformi es tipal causada par la ata de un dio.
La idea permane tra la Eda Medieval, cuando la causa de mutaformi es un sorsor, e a la periodo moderna. La mitos la plu comun de mutaformia es los de teriantropia, cual es la cambia de un umana a un animal, per esemplo un om-lupo o un vampir, o la cambia de un animal a un umana. Lejendas permete cambias a plantas o cosas e la cambia de la aspeta de un person, como bela a fea o fea a bela.
Mutaformas es spesial comun en la mitos de Scandinavia, de Er, e de Elas antica, e en la mitos de americanes orijinal. Esemplos inclui Loki, la dio de turba e malia, e Odin, la dio de sajia e gera en la mitolojia norsce antica; simil, Zeus es notada per sua tende de desembla (a veses per ensinti femes ci el desira) e per cambia otras a animales o plantas per puni los; e, entre la alga tribus de americanes nativa, sorsores comun pote mutaformi par usa preparas majial. En folclor e fables plu moderna, on pote leje de mutaformas en naras como "Bela e la Bestia" e "la Prinse-rana"
En leteratur moderna de fantasia, mutaformi es usada: la naras de J. R. R. Tolkien, per esemplo, de J. K. Rowling, e de C. S. Lewis conteni avenis de mutaformi. En programes de televisa, on pote vide om-lupos e vampires, etc, per esemplo en Buffy, the vampire slayer (Buffy, la mator de vampires") e The twilight saga ("la saga de duilus"). La jenero de naras siensal comun usa los como un tema, incluinte la programes e filmas de Star Trek ("viaja stelal").