J. R. R. Tolkien

De Vicipedia
J. R. R. Tolkien

Informa personal

Nase: 3 janero 1892
Mori: 2 setembre 1973
Pais: Rena Unida

Otra informas

Profesa: Profesor de universia, filolojiste e scrivor

John Ronald Reuel Tolkien CBE, FRSL (3 janero 1892 – 2 setembre 1973) ia es un scrivor, poesiste, filolojiste e profesor de universia. El es conoseda per sua obras La hobit, La senior de la anelos e La silmarilion. El ia nase en 1892 en Bloemfontein en Sudafrica e ia mori en Bournemourth, en la contia Dorset en England.

El ia servi como profesor en Pembroke College de la Universia de Oxford de 1925 a 1945, e en Merton College de 1945 a 1959. A un tempo el ia es un ami prosima de C. S. Lewis – ambos ia es membros de un grupo nonformal de discute leteratural nomida Inklings. Tolkien ia es altida a Comandor de la Ordina de la Impero Brites par Rea Elizabeth 2 a 28 marto 1972.

Pos la mori de Tolkien, sua fio Christopher ia publici un serie de obras fundida sur la notas estendosa e manoscritos nonpublicida de sua patre, incluinte La silmarilion. Estas, con La hobit e La senior de la anelos, formi un corpo liada de naras, poesias, istorias imajinada, linguas inventada e esajos leteratural sur un mundo de fantasia nomida Arda, e de Tera Media en lo. Entre 1951 e 1955, Tolkien ia aplica la terma lejendario a la plu de esta scrivedas.

An si multe otra autores ia publici obras de fantasia ante Tolkien, la susede grande de La hobit e La senior de la anelos ia gida direta a un reativi poplal de la jenero. Par esta causa, on ia identifia Tolkien como la "padre" de leteratur moderna de fantasia – o, plu esata, de fantasia alta. En 2008, la jornal The Times ia loca el como numero ses en un lista de "La 50 scrivores brites la plu grande de pos 1945". Forbes la lista el como numero sinco de la "selebradas mor" ci gania la plu mone en 2009.

Cuando el ia es un adolesente joven, Tolkien ia encontra a la ves prima un lingua construida, "animalic", un inventa de sua cusines Mary e Marjorie Incledon. A acel tempo, el ia studia latina e anglosason. La interesa de los a animalic ia desapare rapida, ma Mary e otras, incluinte Tolkien mesma, ia inventa un lingua nova e plu complicada, nomida "nevbosh". La lingua construida seguente con cual el ia labora, "naffarin", ia es sua propre creada.

Tolkien ia aprende esperanto a alga tempo ante 1909. Sirca 10 junio 1909, el ia composa "La libro de la Foxrook", un libro de des-ses pajes de notas, do la esemplo la plu temprana de un de sua alfabetas inventada apare. Testos cortas en esta libro de notas es scriveda en esperanto.

Vide ance[edita | edita la fonte]