Leon
La leon (Panthera leo) es un mamal carnivor en la familia Felido. El es un gato musculosa, con un peto profonda, un testa corta e ronda, un colo reduida, oreas ronda, e un mexa a la fini de sua coda. La leon es sesal dimorfe; mases es plu grande ca femas e pesa entre 150 a 250 kg per mases e 120 a 182 kg per femas. La mas ave un crinera protendente, cual es la marca la plu reconosable de la spesies. Un asosia de leones es composada de alga mases adulte, femas relatada, e leonetas. Grupos de femas xasa tipal con lunlotra, xef xasante ungulatos grande. La spesies es un predor culminante, ma los foraje cuando oportunias aveni. Alga leones es conoseda como xasante umanas, an si la spesies no fa esta tipal.
Tipal, la leon abita savanas ma es asente de forestas densa. El es plu comun diurna ca otra gatos grande, ma cuando persegueda el ajusta a ativia a note e duilus. En la plestosene, la leon ia abita tra Eurasia, Africa, e America Norde, ma oji el ia es reduida a poplas fratida en Africa susaharan e un popla sever menasada en India ueste. La poplas en Africa ia descrese par sirca 43% pos la desenio de 1990 temprana. Poplas de leones no es asetada estra areas protejeda. An si la causa no es plen comprendeda, la perde de abita e frontis con umana es la causas per conserna la plu grande.
Un de la animales simbolal la plu reconoseda en cultures umana, la leon ia es depintada e scultada, mostrada sur banderas nasional e loca, e en filmas e leteratur contempora. Leones ia es mantenida en zos de la eda de la Impero Roman e ia es un spesie xef per esibi tra la mundo de la sentenio 18 tarda. Representas de leones ia es comun en a periodo paleolitica alta; siselis e depintas en la Cava Lascaux e Cava Chauvet en Frans ia es datida a 17,000 anios a pasada, e imajes ia es trovada en cuasi tota cultures antica e medieval cual coaveni con la estendes pasada e presente de la leon.