Jua real de Ur

De Vicipedia
Jump to navigation Jump to search
La jua real de Ur, table e pesos

La jua real de Ur es un jua de table stratejial cual ia es prima juada en Mesopotamia antica en la milenio 3 aec temprana. La jua ia es popular tra Asia sude-ueste entre tota stratos sosial, e tables per jua lo ia es trovada a loca tan distante de Mesopotamia como Criti e Srilanca. Cuando lo ia es la plu popular, la jua ia oteni alga sinifias spirital, e avenis en la jua ia es crededa como refleta la futur de la juor e envia mesajes de divines o otra esentes supranatural. La jua de Ur ia resta popular asta la eda antica tarda, cuando lo ia para es juada, posible evoluinte en o desponeda par, un forma temprana de trictrac. Lo ia es ultima oblida par tota estra un popla iudi de la site indian de Kochi, ci continua jua un varia de lo, cual lo nomi aasha asta la desenio de la 1950, cuando los ia comensa migra a Israel.

La jua de Ur ia reseta sua nom car lo ia es prima descovreda par la arceolojiste engles Leonard Woolley en sua escavas de la Semetero Real de Ur entre 1922 e 1934. Copias de la jua ia es trovada de alora par otra arceolojistes en Asia sude-ueste. La regulas e la jua como lo ia es juada en la sentenio 2 aec ia es conservada sur un tableta babilonian de arjila, scriveda par Itti-Marduk-balatu sirca 177 aec. Seguente esta tableta e la forma de la table de la jua, la conservor de la Museo Brites, Irving Finkel ia reconstrui la regulas fundal de como la jua ia pote es juada. La ojeto de la jua es per core la curso de la table e pasa a estra de la ta le ante sua oposor. Como trictrac moderna, la jua combina elementos de stratejia e fortuna. Un jua pote dura un dui ora e pote es multe intensa.

Tables per la jua de Ur ia es trovada en Iran, Suria, Egipte, Lubnan, Srilanca, Cipros, e Criti. Cuatro tables multe simil a la orijinal ia es trovada en la camera de la tomba de Tutankhamun. Esta tables ave caxas peti per teni la dados e pesos, e multe ia ave tables per senet a la inversa. Un varia taliada, posible con un daga, ia es descovreda sur un de la gardas de la portetas en la forma de un bove con alias e un testa umana de la palasio de Sargon 2 (721-705 aec) en la site de Khorsabad.

Cuando la jua ia oteni sinifia superstisial, alga de la cuadros ia ave predises neblosa como "tu va trova un ami", "tu va deveni potiosa como un leon", o "tu va tira bon bir". Susede en la jua ia indica susede en vive jeneral. Avenis acaso ia es interpreteda como mesajes de divines, spiritos de asendentes morida, o la spirito de la person mesma.

Un dado tetraedro

La jua de Ur es un jua de corsa e es probable la asendente direta de la familia de juas de trictrac. Lo ia es juada con du grupos de sete pesos en la forma de discos, como en la jua dama. Un grupo es blanca con sinco puntos negra, e la otra es negra con sinco puntos blanca. La table es composada de du retangulos de cuadros, un retangulo con tre linias de cuatro cuadros en cada linia, e la otra con tre linias de du cuadros en cada linia, juntada par un "ponte magra" de du cuadros. La moves de la pesos es determinada par lansa cuatro dados formida como tetraedros (pd, con cuatro lados). Du de la cuatro angulos de cada dado es marcada con un punto e pinta, e la otra du no es marcada. La cuantia de angulos marcada cual fasa a supra pos un lansa - zero, un, du, tre, o cuatro - indica cuanto cuadros un juor pote move un de sua pesos en sua turno.

La gol de la jua es la move de tota sete de sua pesos longo la curso e de la table ante sua oposor. Sur tota tables survivente, du lados de la table es sempre identica con lunlotra, cual sujesta ce la du lados parteni a cada juor. Cuando un peso es su un cuadro de un juor, lo es secur de catura, ma cuando lo es sur un de la oto cuadros a la media de la table, la pesos de sua oposor pote catura lo par fini sur la mesma cuadro, cual envia la peso de la table afin lo pote recomensa la curso. Plu ca un peso no pote resta sur un cuadro a un ves, donce si on ave tro multe pesos sur la table a un ves, on pote es restrinjeda en sua move.

La cursos probable de la pesos

Cuando un juor lansa la dados, el pote eleje move cualce de sua pesos sur la table, o ajunta un peso nova a la table si el ave ancora pesos cual no ia entra la jua. Un juor no es esijeda per catura un peso cada tempo cual el ave la oportunia. Ma juores es sempre esijeda per move un peso cuando posible, an si lo resulta en un fini nonfortunosa. La tables antica tipal ave sinco imajes de flores, como on pote vide en la foto de la table. La flor en la linia sentral donce securi a la peso, e un plu lansa de la dados per un otra move. La otra cuatro flores dona un plu lansa de la dados per un otra move. Afin un peso pote sorti de la borda, un juor debe lansa esata la cuantia nesesada per sorti.

Un escava arceolojial ia trova 21 bales blanca a un lado de un jua de Ur. Los crede ce esta bales ia es probable usada per aposta. Seguente la tableta de Itti-Marduk-balatu, cuando un juor pasa un de cuadros con un flor, el debe pone un bal en la vaso. Si un juor fini sur un flor, el pote estrae un bal de la vaso. Esta es pur un divina, natural, estra la sertia ce aposta probable es un parte normal de la jua!

Un nota: A la table en la imaje a supra, on pote vide ce cada cuadro ave un imaje. Estra la flores, la sinifia, si un sinifia esiste, no es sabeda. Ma la interesa en numeros de la mesopotamianes sujesta ce los pote ave alga sinifia:

5 cuadros con flores con 8 petales
5 cuadros con 4 oios
5 cuadros con 5 sirculos
2 cuadros con 5 puntos
2 cuadros con 20 puntos
1 cuadro con 12 puntos