Istoria de Portugal

La vinse portuges en la batalia de Aljubarrota contra Castelia ia securi la autonomia de Portugal.

La istoria de Portugal como nasion european comensa en la Eda medieval basa, cuando la contia Portucalense ia deveni autonom de la rena de Leon. An tal, la istoria de la presentia umana en la teritorio corespondente a Portugal ia comensa multe a ante. La preistoria rejistra la umanas prima a 500 000 anios ante aora. La teritorio ia es visitada par poplas diversa: la fenisias, ci ia fundi fabricerias, ia es plu tarda sustituida par la punicas. La poplas celta ia apare e misca con la nativas. En la sentenio 3 aec lo ia es abitada par poplas diversa, cuando la invade roman de la penisola iberian ia comensa. La romani ia lasa marcas durante en la lingua, la lege e la relijio. Con la cade de la Impero Roman, lo ia es invadeda par la poplas germanica e a pos par la muslimes, a cual tempo la cristianes ia fuji a la norde, a Asturias.

En 1139, con la reconcista cristian, on ia fundi la Rena de Portugal de la contia Portucalense, naseda entre la rios Minio e Duero. La stabli de la fronteras en 1297 ia converti Portugal a la pais european con la fronteras la plu antica. Como abrivia en la esplora maral en la Eda de la Descovres, la rena de Portugal ia estende sua teritorios entre la sentenios 15 e 16, fundinte la impero global prima de istoria, con poseses en Africa, America Sude, Asia e Oseania. En 1580 un crise de pasa de rena ia aveni en la Uni Iberian con Espania. Sin autonomia per defende sua poseses ultramar contra la atacas nederlandes, la rena ia perde multe de sua ricia. En 1640 la autonomia ia es restorada su la dinastia de Bragansa. La trematera de 1755 en Lisboa, e la invades espaniol e franses, ia resulta un nonstablia political cual ia provoca la perde de la colonia la plu grande, Brasil.

Un revolui en 1910 ia suverti la monarcia, ma la republica portuges prima no ia susede fini la problemes de un pais sumerjida en disputas sosial, froda e lutas con la Eglesa. Un colpa de stato en 1926 ia marca la comensa de la autocratia. De 1961 un gera colonial ia comensa, continuante asta 1974, cuando un revolta militar ia suverti la governa. Pos la periodo revoluinte, Portugal ia entra a democratia. La constitui de 1976 defini Portugal como un republica semipresidental. De 1986 lo ia reforti la moderni con la entra a la Comunia Economial European.

Anticia

Romani

La romanes ia comensa la invade de la penisola iberian (cual los ia nomi "Hispania") en 218 aec, en la Gera Punica Du contra Cartago.

Invade arabi

En 711, un armada gidada per Tariq ibn Ziyad ia desembarca en Jibraltar pos concista la norde de Africa. Profitante de la lutas interna cual ia divide la visigotas e la de Acila 2, los ia vinse en la batalia de Guadalete contra la forsas de la re visigota Rodrigo. Rapida los ia avansa asta Zaragoza, esplotante la manca de persones en la penisola. La teritorio ocupada es nomida Al-Andalus. La ueste de la penisola, cual coresponde a Portugal, ia es nomida Gharb Al-Andalus o simple Al-Garb (ueste).

La poplas local ia pote permane en sua teras ma paiante. Sua abituas, cristian e iudi, ia es tolerada. An si los ia es arabi, la mozarabis ia garda sua dialetos romanica (la lingua mozarabi) e rituos cristian. La ocupores nova ia developa la cultiva de ris e abricocas e pescas.

Formi de la rena de Portugal (1139-1385)

Bandera de la Contia Portucalense.

De 718, refujante se de la invade muslim rapida de la penisola Iberian, un grupo de cristianes visigoto ia resiste en la norde, en la rejion montaniosa de Asturias. Ala, gidada par Pelaio, ia funda la Rena de Asturias e ia comensa la reconcista de teritorios. Esta prosede gradal ia orijina la nase de renas peti, cual ia crese cuanto la concistas ia es susedosa. Tal ia nase la Rena de Leon, de Navarra, de Aragon, de Castelia e de Galisia.

En 1096, la re Alfonso 6 ia dona la governa de la Contia Portucalense, formida en 868 entre la rios Minio e Duero, a Henrico de Burgonia par sposi con sua fia Teresa de Leon. A pos la mori de Sr Henrico, Sra Teresa ia atenta estende sua dominas e oteni autonomia aliada con la alta nobilia galego contra sua duisoror Urraca de Leon e Castelia. Ma en 1121 ela ia debe retira e negosia un trata, manteninte se la contia como un vasal de la rena de Leon.

Teresa ia es rejente cuando sua fio Afonso Henriques, ia es peti. Ma en 1122 la interesa de ambos ia desacorda, cuando la fio ia oposa un uni galego-portuges. La posa de favorisme de Sra Teresa en relata con la nobiles galego e sua noncurantia con la seniores e pretes portucalense ia orijina un revolta cual esta ia gida. Sr Afonso Henriques ia deveni cavalero e ia vade vive en Coimbra. En 1128 el ia vinse en la batalia de San Mamede contra la fortias de sua madre e Fernan Peres de Trava. El ia prende la governa de la contia e ia foca sua fortias en negosias con la Seja Santa per oteni un autonomia. Simultan el ia atenta estende sua dominas, concistante teritorio a la muslimes, en cuando el ia luta contra la fortias de sua cusin Alfonso 7 de Leon e Castelia.

En 1139, a pos un vinse importante contra muslimes en la batalia de Ourique, Sr Afonso Henriques ia es proclamada re de Portugal, con la suporta de sua soldatos. Tal ia nase de rena de Portugal, con capital en Coimbra e ia comensa la dinastia prima. La nondepende de Portugal ia es reconoseda par Leon e Castelia en 1143 par la trata de Zamora. En 117, con la suporta de la crusadores de Europa norde, Alfonso 1 de Portugal ia concista Lisboa. Con la pasi interna, el ia continua concistante la muslimes, puiante la fronteras a sude, de Leiria a Alentejo.

On considera ce lo ia es en 1211, esente Afonso 2 re, la ves prima cuando ia es asemblada la cortes en Coimbra con representores de la eglesa e la nobilia. Leges importante ia es publicida per proteje la benes de la corona, garantia la librias e proibi la maltrata de la ofisiores publica real.

En 1249, la Algarve morisca ia es incluida en la rena cristian de Portugal, fininte la reconcista portuges. Esta ia aveni en la rena de Afonso 3, ci ia estende sua titulo a "Re de Portugal e de Algarve". En 1254 ia es asemblada Cortes en Leiria, do ia es a ves prima representores de vilas e sites. En 1297 Sr Dinis ia sinia la pas con la renas de Leon e Castelia e ia fisa la fronteras con la Trata de Alcanizes. Anos ante, en 1290, el ia adota como lingua ofisial de la rena la "lingua demotica" (galego-portuges), a cual el ia nomi "lingua portuges".

Bibliografia

• Ramos, Rui et al. (2012) História de Portugal, A Esfera dos Livros.