Determinante

De Vicipedia
Jump to navigation Jump to search

Un determinante es un parola, afisa, o formula cual aveni con un nom o formula nomin e espresa la refereda de acel nom o formula nomin en la contesto. Esta es per dise, un determinante pote indica si la nom refer a un elemento definada o nondefinada de un clase, a un elemento plu o min distante, a un elemento cual parteni a un person o cosa spesifada, a un cuantia de un elemento, etc. Tipos comun de determinantes inclui articles definante o nondefinante (pe "la" e "un"), demonstrantes ("esta", "acel"), posesentes ("mea", "tua", etc), cuantias ("multe", "poca", "alga", etc), numeros, distribuintes ("cada", "cualce", etc), e determinantes de demanda ("cual", "cuando").

En la pasada, linguistes ia clasi determinantes con ajetivos. Ma determinantes ave alga cualias diferente de ajetivos. Ajetivos descrive la refere de la nom, ma determinantes indica alga cosa plu fundal: Los indica la ojeto e comunica detalias plu sujetiva ca ojetiva. "la" indica ce la ojeto es vidable ala, o ce nos conose la ojeto, o ce nos ia discute resente la ojeto; "un" indica ce la ojeto no es familiar, o vidable, etc, e ance ce la ojeto es solitar; "esta" indica ce la ojeto es asi, no tro distante de nos, etc.

Ance en la pasada, alga linguistes ia clasi determinantes con pronomes. Vera, multe determinantes en un lingua pote es usada como pronomes, con o sin cambias de forma. Ma on pote nota ce pronomes indica un ojeto sin defini la clase indicada par la nom, e sin comunica un descrive de la ojeto spesifada.

La usa de determinantes varia multe entre linguas: alga linguas obliga ce sua parlores usa los, e ofre multe parolas como determinantes; otras ave poca, e no demanda ce los es usada. En linguas variante, on pote vide ce la determinantes funsiona plu como ajetivos, o como pronomes. Alga linguas usa afisas en loca de determinantes, pe como la determinante defininte "la" es un sufisa en svensce, norsce, dansce, romanian, xcip, balgarsce, e macedonsce. En suomi e multe otra linguas, determinantes de posese es espresada como un afisa; en multe linguas american orijinal, on debe sempre usa los con nomes nonalienable (pe tua brasos, mea madre, nosa tribu...). An en linguas como lfn e engles, la determinante de pluralia es un sufisa ("-s").

En linguas cual usa determinantes frecuente, on ave regulas per la ordina de la determinantes. Per esemplo, en lfn, "tota" presede "la", "esta", "acel", etc, cual presede "mea", etc, e "multe", "poca", "un", "du", "tre"..., cual presede "otra", "mesma", etc. Lo es no per dise ce on debe usa un lista intera, ma si on usa plu ca un, on debe considera la ordina: "tota la multe cosas", ma no "multe tota la cosas".