Campo abrida

De Vicipedia
Jump to navigation Jump to search
Un plan de un feudo; la bandas jala parteni a la senior; la bandas tramada parteni a la eglesa
Un area en England con crestas e ranures creada par sentenios de usa de la sistem de campo abrida

La sistem de campo abrida[1] ia es la sistem cultival comun en la plu de Europa en la eda medieval, e ia continua a la sentenio 20 en partes de Europa, Rusia, Iran, e Turcia. Su esta sistem, cada feudo o vila ia ave du o tre campos grande, con cada campo alga sentis de acres[2], cual ia es divideda entre multe bandas magre de tera. La bandas o seliones[3] ia es cultivada par individuas o familias de campanianes, comun nomida tenintes o serfos. La propria de un feudo ia inclui ance bosces e pastos per usa comun, e campos parteni a la senior de la feudo e la eglesa. La cultivores ia abita costumal en casas individua en un vileta sentrida, con un casa grande de la senior e un eglesa prosima. La sistem de campo abrida ia nesesa coopera entre la abitantes de la feudo.

La senior de la feudo, sua ofisiores, e un corte feudal ia governa la feudo e ave autoria supra la campaniores. La senior ia comanda luas e labora de la campaniores en sua proprias, nomida sua demesne (domina).

En la Eda Medieval, poca tera ia es poseseda direta. En loca, la senior ia ave diretos donanda a el par la re, e la teninte ia lua tera de la senior. La setiores comanda luas - a veses ruinante - e labora de la tenintes, ma la tenintes ia ave diretos firma de usa de la campos cultivada, e esta diretos ia es eritada par sua desendentes. Un senior no pote espulsa un teninte e no pote lua laborores per sustitui per la teninte, sin un causa legal. La plu de tenintes no ia ave la libria per departi la feudo sin puni o multa per cambia locas o ocupas. La comensa de capitalisme e la conseta de areas de tera como benes cual pote es comprada e vendeda ia resulta con la mori de la sistem de campos abrida.

La sistem de campos abrida ia es gradal recambiada tra alga sentenios par propria privata de tera, spesial pos la sentenio 15 en la prosede conoseda como ensirca (enclosure) en England. Frans, Deutxland, e otra nasiones de Europa norde ia ave sistemes simil a lo en England, ma la sistem ia dura jeneral plu longa a la continente. Alga elementos de la sistem de campos abrida ia es usada par colonistes temprana en la rejion de England Nova de America Norde.

Notas[edita | edita la fonte]

  1. Par "abrida", on intende "sin sercas".
  2. Un acre es sirca .4 ectare.
  3. En England, un selion ia es un furlong (660 pedes) longa e un cadena (66 pedes) larga.