Balder

De Vicipedia
Balder

Balder (acc Baldr, Baldur) es un dio en mitolojia norsce, e la fio de la dio Odin e la diva Frigg. El ia ave multe frates, como Tor e Vali.

En la sentenio 12, Saxo Grammaticus e otra scrivores dansce (scrivente en latina) ia renara la mitos de Baldur, en un modo alga cristianida. Colieda en Island en la sentenio 13, ma fundida sur poesias multe plu vea, la Edda poesial e la Edda prosal conteni alga referes a la mori de Balder, como un trajedia grande per la Aesir e como un predise de Ragnarok. Seguente la Gylfaginning, un libro de la Edda prosal par Snorri Sturluson, la sposa de Balder es Nanna e sua fio es Forseti. En la mesma libro, lo es notada ce Balder ia ave la plu grande barcon sempre construida, la Hringhorni, e ce no loca es plu bela ca sua salon, Breidablic.

Balder es xef conoseda per la nara de sua mori, cual es videda como la prima en un cadena de avenis cual ta condui ultima a la destrui de la dios a Ragnarok. Seguente Voluspa, Balder va es reviveda en la mundo nova.

El ia ave un sonia de sua propre mori e sua madre ia ave la mesma sonias. Car sonias ia es tipal predisente, esta ia depresa el, donce sua madre Frigg ia demanda de tota ojeto sur tera per jura nunca feri Balder. Tota cosas ia promete, ma Frigg ia iniora la viscio, car lo ia pare nonosiva.

Cuando Loki, la dio de turba, ia oia esta, el ia fabrica un lansa majial de esta planta. El ia freta a la loca do la dios ia es juante un pasatempo nova: lansante ojetos a Balder, cual ta bondi de el sin dole el. Loki ia dona la lansa a Höðr (Hoder), la dio sieca e la frate de Balder. Sin intende, Höðr ia mata Balder. Vali, un fio de Odin, ia mata Höðr la dia a pos.

Balder ia es ardeda ritual sur sua barcon Hringhorni, la plu grande de tota barcones. En cuando el ia es portada a la barcon, Odin ia xuxa en sua orea - la rompetesta clavin (sin cualce solve) cual Odin ia demanda de la jigante Vafthrudnir en la poesia Vafthrudnismal.

Nanna, la sposa de Balder, ia lansa se sur la foco funeral per espeta per Ragnarok, cuando el va es reunida con sua sposo. La cavalo de Balder ia es ance ardeda sur la pira. La barcon ia es puiada a mar par Hyrrokin, un jigante fema ci ia veni montada sur un lupo, e ia dona la barcon un colpa tan grande ce foco ia lampi de la roladores e tota tera ia secute.

Pos oia la solisita de Frigg, enviada par la mesajor Hermod, Hel ia promete relasa Balder de la sutera si tota ojetos vivente e mor ta plora per Balder. Tota ia fa lo, estra un jigante fema, Þökk - probable Loki desemblante - ci ia refusa lamenta per la dio matada. Donce Balder ia debe resta en la sutera e no pote emerji asta pos Ragnarok, cuando el e sua frate Höðr ta es reconsiliada e ta rena la mundo nova con la otra fios de Tor.