Xapo

De Vicipedia
Jump to navigation Jump to search

Un xapo es un covre per la testo cual es portada per razonas variosa, incluinte per proteje contra la clima, rituos como gradua de universia, razonas relijial, securia, e como un ajuntable de modo. En la pasada, xapos ia es un indicante de prestijia sosial. En la militar, xapos pote indica nasionalia, ramo de servi, grado, o rejimento. Polisiores tipal porta xapos distinguinte como xapos con bordas o xapetas con borda fronte. Alga xapos aida en proteje sua portante. Per esemplo, la xapo dur proteje laborores construinte de feri par ojetos cadente, un xapon de sol ombri la fas de la sol, un xapon de caubois proteje contra sol e pluve, e un xapo de pelo con alas per la oreas manteni la testo e oreas comfortable. Alga xapos es portada par membros de un profesa, como la xapo silindre portada par xefes de cosina. Alga xapos ave roles relijial, como la mitras portada par bispos e la turban portada par sices.

Nos no ave multe atestas per la esiste de xapos ante sirca 3000 aec, ma los ia es probable comun ante alora. Un de la xapos la plu vea ia es lo de Ötzi, la om jelida de la montanias entre Osteraic e Italia, do el ia reposa de 3250 aec. El ia porta un xapo fabricada de alga pelos de ursos coseda con lunlotra, simil a un xapo rusce ma sin la alas.

Un de la imajes prima de un xapo apare en un depinta en un tomba de Tebes, Egipte, cual mostra un om portante un xapo cono de palia, datida a sirca 3200 aec. Xapos ia es comun portada en Egipte antica. Multe egiptianes de la clase alta ia rasa sua testos, e alora covre los en un xapo intende per manteni un temperatur tolerable. Mesopotamianes antica ia porta comun xapos cono e xapos formida como un vaso inversada.

Otra xapos temprana inclui la pileo, simil a un cipa; la xapeta frigian, portada par sclavos librida en Elas e Roma antica (e usada como un simbol de libria en la Revolui American e la Revolui Franses); e la petaso de Elas, la xapo con un borda prima conoseda. Femes ia porta velos, telas de testa, capetas, xapetas, etc.

Como Ötzi, la Om de Tollund ia es conserveda a oji con sua xapo sur sua testa, an si el ia mori sirca 400 aec en un pantan dansce, cual momida el. El ia porta un xapeta puntida fabricada de la pel de ovea e lana, fisada su la mento par un banda de cuoro.

San Clemente, la padron santa de fabricores de xapos de feltro, ia descovre, suposada, feltro cuando el pleni sua sandales con fibres de lino per proteje sua pedes, sirca 800 ec.

En la eda medieval, xapos ia es un marca de prestijia sosial e ia es usada per indica alga grupos. La Consilio de Lateran 4 de 1215 ia comanda ce tota iudis identifia se par porta la Judenhat ("xapo iudi"), cual marca los como ojetos per antiiudisme. La xapos ia es tipal jala e puntida o cuadral.

En la eda medieval, xapos per femes estende de xarpes simple a un hennin (un xapo cono), e ia indica prestijia sosial. Xapos strutural per femes, simil a los de omes de a corte, ia apare en la sentenio 16 tarda. Xapores ia es tradisional un emplea de femes, ci no sola crea xapos, ma ance eleje dentela, ornas, e ajuntables per completa la robas. La xapores la plu bon ia es de la site Milan en Italia. Milan es ancora un sentro major de moda.

En la dui prima de la sentenio 19, femes ia porta bonetas (xapos cual covre la oreas e es liada su la mento) cual deveni gradal plu grande, decorada con sintas, flores, plumas, e gaza. Par la fini de la sentenio, multe otra stilos ia es introduida, como xapones con bandas larga e la alta plata, la "vaso de flores", e la toco. Per la media de la desenio de 1920, cuando femes ia comensa corti sua capeles corta, los ia eleje xapos cual abrasa la testa como un elmo.