Scola de Frankfurt

De Vicipedia

La Scola de Frankfurt es un scola de teoria sosial e filosofia asosiada con la Institui per Rexerca Sosial a la Universia Goethe en Frankfurt. Comensante en la perioda entre la geras, la scola es composada de neomarxistes no comfortable con la sistemes esistente de capitalisme, faxisme, o comunisme. Multe de esta teoristes ia crede ce teoria tradisional no pote esplica bon la developa turbosa e nonespetada de sosias capitaliste en la sentenio 20. Critical de ambos capitalisme e comunisme, los ia atenta descove un via alternativa per la developa sosial.

Per pleni la ometes ce los ia persepi en marxisme clasical, los atenta estra respondes de otra scolas de pensa, usante la intuis de sosiolojia antipositiva, psicoanalise, esistentialisme, etc. La pensores major ia vole deriva gida de la obras de Immanuel Kant, Georg Hegel, Karl Marx, Sigmund Freud, Max Weber, Georg Simmel, e Georg Lukás.

La tradision filosofial es posible la plu asosiada con Max Horkheimer, ci ia deveni la diretor de la institui en 1930, e ci ia enscrive multe de la teoristes la plu talentosa, incluinte Theodor W. Adorno, Erich Fromm, e Herbert Marcuse.

La developa de la scola ia es afetada multe par la turbo political de la anios entre geras en Deutxland. La pensores ia es spesial influeda par la fali de la revolui comuniste en Europa ueste (do Marx ia prediseda la revolui ta aveni) e par la asende de nazisme en un nasion tan avansada economial e tecnolojial como Deutxland.

Teoria critical[edita | edita la fonte]

En la fas de esta avenis, Horkheimer e otras ia crea teoria critical, un critica sosial multe autoconsensa cual intende cambia e libri tra lumina, e cual no adere dogmosa a sua propre suposas. La gol orijinal de teoria critical ia es la analise de la sinifia vera de la "comprendas renante" jenerada en sosia burjes, per mostra como los malrepresente interata umana vera en la mundo vera, e en esta modo funsiona per justi o legali la domina de persones par capitalisme.

Horkheimer ia oposa teoria critical contra teoria tradisional, pd en la modo positivistica, cual deriva jeneralis o "leges" sur aspetas de la mundo. Como Max Weber, el sujeste ce la siensas sosial difere de la siensas natural en ce jenerales no pote es fada tan fasil de esperias personal car esta esperias es se mesma fabricada par la ideas ja en la rexercor. La rexercor es, sin es consensa de lo, en un contesta istorial cual forma sua pensa.

La teoristes de la Scola de Frankfurt ia persepi ce un metodo dialetica pote sola es adotada si lo ta pote aplica se a se mesma. Critica, como usada par marxistes, sinifia la esamina de un ideolojia de un sosia (pe, la crede en libria individua o capitalisme de un mercato libre) e compara lo con un realia sosial suposada par la mesma sosia (pe nonegalia sosial e esplota).

Un critica temprana de la teoria critical, orijinal de la sinistre, ia razona ce la teoria critical es no plu ca un forma de "idealisme burges", sin cualce relata real a la pratica political e es isolada de la realia de cualce move corente de revolui. Esta critica ia es espresada par Georg Lukács como la "Otel Grande Profondon", un sindrom el ia asinia a la Scola de Frankfurt!

Marxisme cultural[edita | edita la fonte]

"Marxisme cultural" refere a un teoria de conspira cual vide la Scola de Frankfurt como un parte de un move continuante per prende controla (o an destrui) de la cultur de la ueste (pd, fundida en la cultur tradisional de Europa).

Orijinal, la terma ia refere a un critica cultural cual es diretada a la aspetas de cultur cual es gidada par profita e usa la metodos de produi cadenada en capitalisme. Ma sirca 1990, la fortias destriste ia comensa usa la terma per critica la fortias sinistriste. Lo ia punta a la idea de "coretisme cultural" como un causa de la dejenera de la cultur de la ueste.

Istoristes como Heidi Beirich e Martin Jay ia nota ce la destristes usa esta terma per promove la idea ce tota problemes sosial es causada par feministes, omosesales, afroamericanes, migrantes, multiculturistes, ateistes, agnostistes, muslimes, globalistes, e pasistes.

Matthew Feldman ia trasa la usa de la terma a la conseta ante la geras en Deutxland de "bolxevisme cultural", un parte de la teoria de dejenera cual la nazis ia promove. Aora, lo es usada par destristes relijiosa como William S. Lind, Pat Buchanan, e Paul Weyrich, e plu tarde par la move "alt-right" (destrisme alternativa) e moves per la supremia de blancas.

Orijinal un terma usada en la SUA, lo ia estende a Britan e otra nasiones european, spesial pos la geras contra estremistes muslim e la problem de refujadas de esta geras.