Pasisme

De Vicipedia
Jump to navigation Jump to search
La simbol de pas, cuasi universal en la mundo moderne

Pasisme es la oposa a gera, militarisme, o viole. La parola ia es creada (como "pacifism") par la promover franses de pas Émile Arnaud (1864–1921), e ia es adotada par otra ativistes a la Congresa des de Pas Universal en Glasgow, en 1901. Un terma relatada es ahimsa (sanscrito per "no feri"), cual es un filosofia sentral en Induisme, Budisme, e Jainisme. Lo es ance un idea sentral en la lesones par Jesus Cristo.

En tempos moderne, interesa ia es reviveda par persones como Henry David Thoreau e Leo Tolstoy en sua obras tarde, spesial en La rena de dio es en tu. Mahatma Gandhi (1869–1948) promoveda la pratica de oposa firma nonviolente, cual el nomi satyagraha, importante en sua rol en la promove per autonomia indian. La efetosia de esta ia inspira Martin Luther King Jr, James Lawson, Thich Nhat Hanh, e multe otras en la promove per diretos sivil.

Pasisme es compende par individuas en modos diferente. La interpreta la plu estrema es pasisme completa, cual dise ce cualce forma de viole es mal. Esta no es un idea fasil realida, an si lodable. Con la multe casos de malia en la mundo, algun ci no atenta combata lo en tota casos es, en alga opinas, aidante la malia.

La plu de pasistes crede ce viole es serta mal, ma on ave casos en cual viole no pote es evitada. La esemplos plu clar es cuando on es atacada, e nonata ta resulta en moria, o cuando algun ataca un inosente, pe un enfante, un person sin defendes, o un person ci es atacada per no razona plu ca odi.

Un caso multe difisil es la idea de un gera justida. Multe geras es causada par la persones ci rena o controla un tribu, nasion, o otra organiza, per estende sua potia, ricia, etc. La plu de pasistes crede ce razonas como "suporta tua nasion" o "batalia per tua re", no sufisi. Ma lo es posible, los pensa, ce un gera es nesesada, denova per autodefende o la defende de la inosentes. Otras ta ajunta razonas como batalia per libria, contra tiranos, contra invadores, e simil. Ma otras ancora crede ce la metodos de nonviole, como los de Gandhi, es plu produosa.