Rio de Plata
La Rio de Plata (espaniol per "rio de arjento") es la estuario formida par la conflue de la Rio Uruguai e la Rio Parana. Lo esflue a la Mar Atlantica, en la forma de un embuto indentente a la costa la America Sude sude-ueste. Lo es comun videda como sola un estuario o an un golfo. Si lo es videda como un rio vera, lo es la rio la plu larga en la mundo, con un larga masima de 220 km.
La rio es sirca 290 km de longia e largi de sirca 2 km a sua comensa a sirca 220 km a sua boca. Lo formi parte de la borda entre Arjentina e Uruguai, con la portos major e la sites capital de Buenos Aires e Montevideo sur sua rivas ueste e norde. La rivas de la rio es la areas la plu poplada de Uruguai e Arjentina.
La basin de la Rio de Plata es un area idrolojial de 3,170,000 km2 cual drena a la Rio de Plata. Lo inclui areas de Bolivia sude, Brasil sude e sentral, la pais intera de Paraguai, la plu de Uruguai, e Arjentina norde. Composante sirca un cuatri de la surfas de la continente, lo es la basin du de grandia en America Sude (pos la basin de la Rio Amazona), e un de la plu grande en la mundo.
La Rio de Plata ia es esplorada par europeanes portuges, espaniol, e engles en la sentenio 16. La esploror Sebastian Cabot ia dona sua nom moderna, per la ornetas arjento el ia compra de la popla orijinal, la guarani. La colonia european prima ia es la site de Buenos Aires ("bon airas"), fundida par Pedro de Mendoza a 2 febrero 1536. Esta colonia ia es pronto abandonada. Ma plu esplora contra la flue ia resulta en la fundi de Asunsion en 1537. Buenos Aires ia es refundida par Juan de Garay a 11 junio 1580.