Petea

Petea (o petteia) es la nom elinica de un jua cual plu tarda deveni conoseda como ludus latrunculorum o latrunculi (pd "la jua de la banditos"). Esta un un jua de stratejia juada tra la Impero Roman. Algas sujesta ce esta sembla xace o damas, ma la plu de espertas crede ce lo es un jua de taticas militar. Posible, lo es la asendente de juas de Europa norde como tafl, etc. De causa de la asentia de detalias sur la regulas, la reconstrui de la jua s sua strutur fundal es difisil. Asi es un descrive probable.

La jua es composada de 1, 2, o 3 linias de pesos oposante sur un table divideda entre cuadros. La tables descovreda es de 8 par 8, 10 par 10, e 8 par 12, con varias trovada en la rejiones variosa de la impero. La move de la pesos no es serta, ma la sujeste plu comun es ce los move como la tore en xace, pd cualce cuantia de cuadros ortogonal. La modo de catura es la pinsor, en cual un peso es caturada cuando du pesos oposante es juada a cada lado de lo. Si on pote catura un linia plu grande ce un peso no es conoseda. La ganior es la juor ci catura tota pesos de sua oposor.

En alga varias sujestada, un peso es nomida la duxe, con la vantaje de la capasia de salta supra otra pesos sin catura los. Un otra modo de jua sujestada ave pesos ci pote move sola un cuadro ortogonal a un turno, ma tota es capas de salta supra otra pesos.

La jua es notada en la obras de Homer, e par Socrate en La Republica par Plato. En leteratur roman, lo es prima notada par Varro (116 - 27 aec) en sua libro 10 de De lingua latina. Ovid e Martial refere a lo ance.

Un esemplo de un 8 par 12 table, con 12 pesos per cada juor:

🔴							⚫️
🔴							⚫️
🔴							⚫️
🔴							⚫️
🔴							⚫️
🔴							⚫️
🔴							⚫️
🔴							⚫️
🔴							⚫️
🔴							⚫️
🔴							⚫️
🔴							⚫️