Pan plata

De Vicipedia
Jump to navigation Jump to search

Un pan plata es un pan de farina, acua, e sal, e alora rolada a un pasta plata. Multe panes plata no es levada con fermentante, ma alga es levada, como pizas e pitas. Panes plata varia entre su un milimetre a alga sentimetres spesa per come fasil sin es taliada. Los pote es fornida, fritada en olio, grilida, coceda en un padela, etc.

En 2018, picos de pan carbonida ia es trovada a un loca natufian nomida Shubayqa 1 en Urdun, datida a 12,400 aec, alga 4 mil anios ante la comensa de cultiva en la rejion. Analise ia mostra ce los ia es probable de pan plata conteninte orzo savaje, trigo, avena, e tuberes de Bolboschoenus glaucus (un tipo de junco (planta)).

De la eda de la pan plata la plu vea, pan plata ia sperde tra la mundo intera, con varias a veses peti. Asi es alga de los:

Khubz ( arabi: خبز‎, khubzun), acc pan arabi, pan lubnan, pan suri, o pan afgani, es la parola arabi jeneral per "pan", cual en esta rejiones es tipal pan plata, un parte esensal de comes de Arabia a Maroco. Lo es multe simil a la panes plata de la Balcanes e Asia sude e sentral. Los ia es fornida tradisional en un tanur, un forno silindre fabricada de brices caldida per forni la pan. La pan, acc nan, es formida e liada a la mur interna de la forno.

Roti (incluinte chapati) es un pan plata ronda nativa a la sucontinente indian, fabricada de farina de gran completa e molida su petras, conoseda como gehu ka atta, e acua. Lo no usa fermentante. La varia cual usa fermentante es nomida kulch. Roti es un acompaniante tipal a otra comedas.

Puri es un pan fritada en gras, fabricada de farina de trigo completa e nonlevada. Lo es comeda en India per la come de matina o un come lejera. Lo es servida tipal con un cari saborosa, como en puri bhaji, ma pote ance es comeda con comedas dulse. Los es ance servida a avenis spesial o ritual con otra comedas vejetal, o ofreda en prea como prasadam (un comeda cual pote es usada como un ofreda a la dios).

Pitas composa un familia de pan plata ronda, levada, de farina de trigo, comun en la Mediteraneo, Asia sude-ueste, e areas visina. Lo inclui la varia con un poxe interna, conoseda como pan arabi o khubz, e la varia elinica usada per envelopa souvlaki (un cebab de carne). La nom pita es ance usada per otra varias.

Matzo (ides: מצה‎ matsoh, ivri: מַצָּה‎ matsa) es un pan plata nonlevada cual es un parte de cosina iudi e un parte integral a la festa de pesah, en cuando, par lege iudi, fermentante e la sinco granes no es permeteda. Seguente la tora, Dio ia comanda ce la iudis per crea esta pan spesial. Lo es comeda como un cracer o usada como pesetas de pan en la sopa tradisional con bales de matzo.

Pan fritada es un pan plata fritada en olio o lardo. Lo es fabricada con ingredientes simple e pote es comeda solitar o con salsa variosa como miel, jalea, zucar polvida, carne de servo o bove. Lo pote ance es usada como tacos, como en la cosina de la americanes orijinal dine.

Johnnycake (pron djanicec; acc hoecake) es un pan plata de farina mais. Lo ia es un comeda comun a la costa este de America Norde de Newfoundland a Jamaica. Lo ia orijina con la americanes orijinal e es ancora comeda en la Indias Ueste, Republica Dominican, San Croix, Bahama, Colombia, Bermuda, la SUA, e Canada. Lo es asosiada con la cosini de England Nova. Un johnnycake moderna es gaxa de farina de mais (jala o blanca) miscada con sal e acua calda o lete, e a veses dulsida.

Un tortilia es un comeda plata e ronda, tipal de farina de mais o trigo. La Astecas e otra parlores de la linguas nauatl nomida los tlaxcalli. La orijina es en la cultures de America ante la coloni european, e dati a ante 500 aec.

Un blini (rusce: блины, ucrainsce: млинці, налисники) es un pan plata rusce e ucrainsce fabricada de farina de trigo o saraseno e servida con smetana (crema asida), tvorog (ceso blanca), bur, caviar, e otra decoras. Blini es un de la platos la plu popular en Rusia. En la ueste, la nom blini tradisional refere a crepes peti saborosa. La cosini iudi en la SUA ave un varia nomida la blintz, cual ave un plenida de ceso e alora fritada en olio. Los es spesial popular a festas como hanuca.

Focaccia es un pan plata italian, simil en stilo e trama a la pasta per piza. Focaccia pote es usada como un plato ladal o como un pan per sanduitxes.

Piza es un plato saborosa orijinal de Italia composada de un funda plata de pasta de farina de trigo, con tomates, ceso, e otra ingredientes, como anxoas, xampiniones, oniones, olivas, ananas, carne, etc, cual es alora fornida a un temperatur alta, tradisional en un forno usante lenio. Calzon es esensal un piza pliada e cluida con sua ingredientes a en.

Tunnbröd es un varia svensce de pan plata, e ia es un parte de la cosini tradisional en cual la femes de un vila comparti un paneria per produi lo. Lo pote es mol o cracosa e es trovada en multe varias de gran, usa de levante, etc. La pasta es fabricada de cualce combina de trigo, orzo, e segal, la levante pote es fermento o carbonato de amonia. La tunnbröd mol es usada comun como un crepe o tortilia como un envelopa per otra comedas. Un plato popular es un tunnbröd rolada sirca patatas maxada e un salsix american. Un otra metodo tradisional es tunnbröd mol con arenge fermentada (surströmming), e como un sumerji en la bol (dopp i grytan) Un pan mol e spisida es usada per esta e la pan es moiada en la bulion cual resta de coce la jamon de natal.

La otra paises scandinavian ave sua propre varias: Flatbrød es la pan plata de Noria, tipal comeda con pex, carne salosa, e sopas. Un otra varia norsce es lefse, un pan plata mol fabricada de patatas, farina, bur, e lete o crema. Rieska es un pan plata de Suomi, mol, nonlevada e tipal de orzo, servida calda con bur e lete. Flatkaka o flatbrauð es un pan de segal nonlevada, mol, ronda, magra, e sombre, e Island.